ދިރާގު ދިވެހި ޕްރިމިއާ ލީގުގައި ރަނގަޅު ކުޅުމެއް ދައްކަމުން އައި ދަ ގްރާންޑޭ ސްޕޯޓްސް ކްލަބް އަތުން 5-0 އިން ހޯދި ބޮޑު މޮޅާ އެކު ލީގުގެ އެއް ވަނައިގައި އެންމެ ފަހުގެ ޗެމްޕިއަން މާޒިޔާ އިން ހަ ޕޮއިންޓުގެ ލީޑެއް ލިބުނު ނަމަވެސް މިއީ އަދި ވަކި ގޮތެއް ނިންމަން އަވަސް ވަގުތެއް ކަމަށް މާޒިޔާގެ ކޯޗު ރެސްޓޯ ވިޑަކޮވިޗް ބުނެފިއެވެ.
މި މެޗުގައި ދެއްކި ކުޅުމާ މެދު ހިތްހަމަޖެހޭ ކަމަށް މާޒިޔާގެ ކޯޗު ވިޑަކޮވިޗް ވަނީ ބުނެފަ އެވެ. އެކަމަކު އޭނާ ދެކޭގޮތުގައި އެ ޓީމަށް މި އަށް ވުރެ ރަނގަޅަށް ވެސް ކުޅެވިދާނެ އެވެ. ރަނގަޅުކުރަންވީ ޓީމެއްގެ ގޮތުގައި ކުޅުމަށް ކުރަން ޖެހޭ މަސައްކަތް ކަމަށް އޭނާ ބުންޏެވެ.
އަހަރެން ދެކޭ ގޮތުގައި އެއީ ވަރަށް ބައިވަރު ގޮތްތަކެއް ވުމުގެ ފުރުސަތު އޮތް މެޗުތަކެއް. ހަ ޕޮއިންޓަކީ (މި ލީޑަކީ) އެ ގޮތަށް ބަލާއިރު މާ ބޮޑު އެއްޗެއް ނޫން. އަހަރެމެން ވަރަށް ސީރިއަސްކޮށް ދެން ހުރި މެޗުތަކަށް ނުކުމެ މެޗަކަށް ވުރެ މެޗެއް ރަނގަޅުކުރުން އޮތީ.
– ވިޑަކޮވިޗް ބުންޏެވެ.
ލީގުގެ އެއް ވަނައިގައި މާޒިޔާ އޮތީ ނުވަ މެޗުން 21 ޕޮއިންޓާ އެކު އެވެ. ދެ ވަނައިގައި އޮތް ވެލެންސިއާ އާއި ތިން ވަނައިގައި އޮތް ދަ ގްރާންޑޭ އަށް ނުވަ މެޗުން ލިބިފައިވަނީ 15 ޕޮއިންޓެވެ.
ކޮމެންޓު ފޮނުވާ