ބަޔާން ލީޑް ދަމަހައްޓައިފި

ޖަރުމަނު ބުންޑަސްލީގާގައި އެންމެ ފަހުގެ ޗެމްޕިއަން ބަޔާން މިޔުނިކާއި ހޯފެންހައިމް ބައްދަލުކުރިމެޗް ފަސޭހަ ކަމާއެކު ކާމިޔާބުކޮށް ޕޮއިންޓް ތާވަލްގައި ބަޔޭންއަށް ލިބިފައިވާ ލީޑު ދަމަހައްޓައިފިއެވެ.

ބަޔާންގެ އެލިއާންޒް އެރީނާގައި ކުޅުނު މިމެޗް އެޓީމް ކާމިޔާބުކުރީ 4-1 ލަނޑުންނެވެ. މިމެޗްގައި ބަޔޭންގެ ފުރަތަމަ ލަނޑު މެޗްގެ 32 ވަނަ މިނެޓްގައި ޖަހާދިނީ ޖެރޮމޭ ބޯޓޭންގއެވެ. އެޓީމްގެ ދެވަނަ ލަނޑު ފުރަތަމަ ހާފް ނިމެން ދެ މިނެޓަށް ވެފައިވަނިކޮށް ޖަހާދިނީ ތޯމަސް މުލަރއެވެ. އަދި އޭގެ އެއްމިނެޓްފަހުން ހޯފެންހައިމްގެ އަންދްރެއި ކްރަމަރިޗް ލަނޑެއް ޖަހާ އެޓީމަށް ހިތްވަރު އާކޮށްދިނެވެ.

މެޗްގެ 57 ވަނަ މިނެޓްގައި ބަޔާންއިން ވަނީ އެޓީމްގެ ތިންވަނަ ލަނޑު ޖަހާ އަނެއްކާވެސް ދެ ގޯލްގެ ލީޑު ނަގާފައެވެ. މިލަނޑު އެޓީމަށް ޖަހާދިނީ ރޮބަޓް ލެވަންޑޯސްކީއެވެ. މިއީ މިފަހަރުގެ ބުންޑަސްލީގާގައި އޭނާ ކާމިޔާބުކުރި 24 ވަނަ ލަނޑެވެ. އަދި ބަޔާންގެ ފަހު ލަނޑު މެޗްގެ 63 ވަނަ މިނެޓްގައި ޖަހާދިނީ ސަރޖޭ ގެނެބްރީއެވެ.

ބަޔާންއަށް މިހާރުވަނީ 19 މެޗުން 45 ޕޮއިންޓް ލިބިފައެވެ. އަދި ވަގުތީގޮތުން 10 ޕޮއިންޓްގެ ލީޑެއް އެޓީމަށް ލިބުނު ނަމަވެސް ދެވަނައިގާ އުޅޭ އާރްބީ ލިބްޒިގް ރޭ ކުޅުނު މެޗުން އެޓީމް މޮޅުވުމުން އެފަރަގު މިހާރު އުޅެނީ 7 ޕޮއިންޓްގައެވެ. މިމެޗުން ބަލިވުމުން ހޯފެންހައިމް މިހާރުވަނީ 19 މެޗުން ލިބިފައިވާ 22 ޕޮއިންޓާއެކު ތާވަލްގެ 12 ވަނައަށް ފަހަތަށް ޖެހިލާފައެވެ.