އިބްރަހިމޮވިޗާއި ލުކާކޫއަށް އެއް މެޗުގެ ސަސްޕެންޝަނެއް

އޭސީ މިލާނުގެ ތަޖުރިބާކާރު ފޯވާޑް ޒްލަޓާން އިބްރަހިމޮވިޗާއި އިންޓަގެ ފޯވާޑް ރޮމެލޫ ލުކާކޫއަށް އެއް މެޗުގެ ސަސްޕެންޝަނެއް ކުރިމަތިވެއްޖެއެވެ.

މި ދެ ކުޅުންތެރިންނަށް އެއް މެޗުގެ ސަސްޕެންޝަނެއް ކުރިމަތިވީ އިޓާލިއަން ކަޕުގެ ކުއާޓާފައިނަލުގައި މިދިޔަ ހަފުތާގެ އަންގާރަ ދުވަހުގެރޭ މިލާން އަތުން ފަހަތުން އަރައި 2-1 ގެ ނަތީޖާއަކުން އިންޓަ މޮޅުވި މެޗުގައި ދެއްކި ކާޑުތަކާ ގުޅިގެންނެވެ. ދެ ރީނދޫ ކާޑު ހަމަވެ ރަތް ކާޑާއެކު އިބްރަހިމޮވިޗަށް ވަނީ ގަވާއިދުގެ ދަށުން އެއް މެޗުގެ ސަސްޕެންޝަނެއް ކުރިމަތިވެފައެވެ. އަދި ލުކާކޫއަށް އެއް މެޗުގެ ސަސްޕެންޝަނެއް ކުރިމަތިވީ އެ މެޗުގައި ދެއްކި ރީނދޫ ކާޑަކީ މި ސީޒަނުގެ އިޓާލިއަން ކަޕުގައި އޭނާއަށް ދެއްކި ދެވަނަ ރީނދޫ ކާޑު ކަމަށްވާތީއެވެ.

އެ މެޗުގައި އިބްރަހިމޮވިޗާއި ލުކާކޫއާ ދެމެދު ދަނޑުމަތީގައި ތަކުރާރުކޮށް ބަހުގެ ހަމަލާތަކެއް ބަދަލުކުރިއިރު، ފުރަތަމަ ހާފުގައި އެ ދެ ކުޅުންތެރިންނަށް ވަނީ ރީނދޫ ކާޑު ދައްކާފައެވެ. އަދި ފަހުން ދެވަނަ ހާފު ފަށައިގެން 13 ވަނަ މިނެޓުގައި އިބްރަހިމޮވިޗަށް ވަނީ ދެވަނަ ރީނދޫ ކާޑާއެކު ރަތް ކާޑެއް ދައްކާފައެވެ. އިބްރަހިމޮވިޗަށް ދެވަނަ ރީނދޫ ކާޑާއެކު ރަތް ކާޑެއް ދެއްކީ އިންޓަގެ އަލެކްސަންޑަ ކޮލަރޯވަށް ކުރި ފައުލަކާ ގުޅިގެންނެވެ.

އިބްރަހިމޮވިޗާއި ލުކާކޫއަށް އެއް މެޗުގެ ސަސްޕެންޝަނެއް ކުރިމަތިވިއިރު، އިޓަލީގެ ރިޕޯޓުތައް ބުނާ ގޮތުން އެ މެޗުގައި ލުކާކޫއާ ނަސްލީ ގޮތުން އިބްރަހިމޮވިޗް ދިމާކުރި ކަމަށް ތުހުމަތުކުރާ މައްސަލަ އިޓާލިއަން ފުޓްބޯލް ފެޑެރޭޝަނުން ބެލުން އެކަށީގެންވެއެވެ. އަދި އެ މައްސަލަ ސާބިތުވެއްޖެނަމަ އިބްރަހިމޮވިޗަށް އިތުރު ސަސްޕެންޝަނެއް ކުރިމަތިވާނެ ކަމަށްވެސް ރިޕޯޓުތައް ވަނީ ބުނެފައެވެ.

އިޓާލިއަން ކަޕުގެ ސެމީފައިނަލުގައި ޔުވެންޓަސްއާ ދެކޮޅަށް އިންޓަ ކުޅޭ މެޗުގައި ލުކާކޫއަށް ނުކުޅެވޭއިރު، އިބްރަހިމޮވިޗަށް ގެއްލޭނީ އަންނަ ސީޒަނުގެ އިޓާލިއަން ކަޕުގައި މިލާނުން ކުޅޭ ފުރަތަމަ މެޗެވެ.