ދަ ގްރާންޑޭއިން ލީގުގެ ދެވަނައަށް ޖެހިލައިފި

ޓީސީ ސްޕޯޓްސް ކްލަބް 2-1 އިން ބަލިކޮށް ދަ ގްރާންޑޭ ސްޕޯޓްސް ކްލަބް ދިރާގު ދިވެހި ޕްރިމިއާ ލީގުގެ ދެ ވަނަ އަށް ކުރިއަށް ޖެހިލައިފި އެވެ.

މިއަދުގެ މެޗުގެ ތިން ގޯލު ވެސް ފެނުނީ ފުރަތަމަ ހާފުގަ އެވެ. މެޗުގެ އަށް ވަނަ މިނެޓުގައި ދަ ގްރާންޑޭ އަށް ލީޑު ނަގައިދިނީ މި ސީޒަނުގައި މޮޅު ކުޅުމެއް ދައްކަމުން އަންނަ ޔަސްފާދު ހަބީބު (މުލަކޭ) އެވެ. ގްރާންޑޭ ލީޑުގައި އޮއްވައި ޓީސީ އަށް ލިބުނު ޕެނަލްޓީއެއްގައި ކަސިއުސް މެލްކޮމް ވަނީ 22 ވަނަ މިނެޓުގައި ނަތީޖާ ހަމަހަމަކޮށްފަ އެވެ. ދަ ގްރާންޑޭ އަށް މެޗުގައި ދެ ވަނަ ފަހަރަށް ލީޑު ނަގައިދިން ލަނޑު 34 ވަނަ މިނެޓުގައި ކާމިޔާބުކޮށްދިނީ މުހައްމަދު ސަހާއު އެވެ.

މޮޅާ އެކު ދަ ގްރާންޑޭ ދެ ވަނަ އަށް އެރީ 15 ޕޮއިންޓާ އެކު އެވެ. ގްރާންޑޭ މޮޅުވުމުން 12 ޕޮއިންޓާ އެކު ކްލަބް ވެލެންސިއާ މިހާރު އޮތީ ތިން ވަނައިގަ އެވެ. ގްރީން ސްޓްރީޓްސް 11 ޕޮއިންޓާ އެކު ހަތަރު ވަނައިގައި އޮތްއިރު ޓީސީ ސްޕޯޓްސް ކްލަބް އޮތީ ނުވަ ޕޮއިންޓާ އެކު ފަސް ވަނައިގަ އެވެ.