ދިވެހި ޕްރިމިއާ ލީގްގެ ފުރަތަމަ ބުރުގެ ސްޓެޓްސް ފޮތް އެފްއޭއެމުން ނެރެފިއެވެ.
މިއީ ރާއްޖޭގެ ފުޓްބޯޅަ ތާރީހްގައި ސްޓެޓްސްއަށް ހާއްސަކޮށް ފޮތެއް ނެރުނު ފުރަތަމަ ފަހަރެވެ. ދަނޑުގައި ބޭއްވި ޕްރެސް ބްރީފިންގައި ވާހަކަ ދައްކަމުން އެފްއޭއެމްގެ ޓެކްނިކަލް ޑައިރެކްޓާ އަހްމަދު ޝަރީފް (ޑުންގާ) ބުނީ، އެ ފޮތަކީ ޓީމުތަކުގެ ކޯޗުންނާއި ޓެކްނިކަލް އޮފިޝަލުންނަށް ބޭނުންތެރިން މުހިންމު ފޮތަކަށް ވާނެ ކަމަށެވެ.
އެފްއޭއެމްގެ ޓެކްނިކަލް ޑިޕާޓްމެންޓްގެ އޮފިޝަލް އަހްމަދު ޝާކިރު (ޝާކިއްޓޭ) ބުނީ، ލީގްގެ ފުރަތަމަ ބުރުގެ މެޗުތަކުގައި ހިނގާދިޔަ ހުރިހާ ކަމެއްގެ ސަމަރީ އެ ފޮތުން ފެނިގެންދާނެ ކަމަށެވެ. ދެ ވަނަ ބުރުގެ ފުރަތަމަ މެޗުގައި، މާޒިޔާ އާއި ވެލެންސިއާ ކުޅުނު މެޗުގެ ކުރިން، ސްޓެޓްސް ފޮތް ނެރެދެއްވީ، އެފްއޭއެމްގެ ނައިބު ރައީސް އަލީ އުމަރެވެ.
މި ފޮތް ނެރުމުގައި އެންމެ އިސްކޮށް މަސައްކަތް ކުރީ އެފްއޭއެމްގެ ޓެކްނިކަލް ޑިޕާޓްމެންޓާއި ސްޓެޓްސް ޑިޕާޓްމެންޓްގެ އިތުރުން ކޮމްޕްޓީޝަން ޑިޕާޓްމެންޓެވެ.
ކޮމެންޓު ފޮނުވާ