ކޯވިޑް19 އެންމެ ފުރަތަމަ ފެނުނު ގައުމު ކަމުގައިވާ ޗައިނާގެ ގިންޑާއޯ ސިޓީން އަނެއްކާވެސް ކޮވިޑް19 ގެ ބައެއް ކޭސްތައް ފެންނަން ފެށުމާއި ގުޅިގެން އެސިޓީގެ 9 މިލިއަން މީހުން ކުރިޔަށް އޮތް 5 ދުވަހުގެ ތެރޭގައި ކޯވިޑަށް ޓެސްޓްކުރުމަށް އެސިޓީގެ ކަމާބެހޭ އިދާރާތަކުން ތައްޔާރު ވެއްޖެއެވެ.
ޗައިނާގެ އައްސޭރިފަށުގައި އޮންނަ މިސިޓީގެ ބައެއް ސަރަހައްދުތައް ލޮކްޑައުންކޮށްފަ ބާއްވައިގެން މި ސިޓީގަ ދިރިއުޅޭ 9 މިލިއަން މީހުން ކޮވިޑަށް ޓެސްޓުކުރުމަށް ސިޓީގެ އިދާރާތަކުން ނިންމާފައި މިވަނީ ގައުމުން ބޭރުން އަންނަ ކޯވިޑަށް ޕޮސިޓިވްވާ މީހުންނަށް ފަރުވާދެމުންދާ ހޮސްޕިޓަލަކާއި ގުޅުންހުރި ބައެއް ކޭސްތައް އެސިޓީން ފެންނަން ފެށުމާއި ގުޅިގެންނެވެ. ޗައިނާގެ ވެރިރަށް ބޭޖިންގގެ އިރު ދެކުނުން 700 ކިލޯ މީޓަރު ދުރުގައި އޮންނަ މިސިޓީން ވަނީ މިމަހުގެ 11 ވަނަ ދުވަހާއި ހަމައަށް ކޯވިޑަށް ޕޮސިޓިވް 6 މީހަކުފެނި އަދި އަލާމާތްތައް ނުފެންނަ 6 މީހަކުވެސް މިބައްޔަށް ޕޮޒިޓިވް ވެފައިވެއެވެ.
ޗައިނާއަކީ މިވަގުތު ދުނިޔޭގައި އެންމެ އަވަސްކޮށް ކޯޥިޑަށް ޓެސްޓުކުރުމުގެ ގާބިލްކަން ލިބިފައިވާ އެއްގައުމެވެ. އަދި ގިންޑާއޯ ސިޓީން ޕޮސިޓިވް ކޭސްތައް ފެންނަން ފެށުމާއި އެކު މިހާތަނަށް އައިއިރު މިސީޓިގައި ވަނީ 140،000 ސިއްހީ އެހީތެރިންނާއި، އެޑްމިޓް ކޮށްފައިވާ ބަލިމީހުން ކޯވިޑަށް ޓެސްޓު ކޮށްފައެވެ.
ޗައިނާގެ ނޭޝަނަލް ހެލްތު ކޮމިޝަންއިން ހާމަ ކުރާގޮތުގައި، އޮކްޓޯބަރު 11 ވަނަ ދުވަހު އެގައުމުގައި ވަނީ އިތުރު 21 މީހަކު ކޯވިޑަށް ޕޮޒިޓިވް ވެފައެވެ. މިއީ ގިންޑާއޯ ސިޓީގައި ޕޮޒިޓިވް މީހުން ނުހިމަނާ މި ކޮމިޝަންއިން އާންމު ކޮށްފައިވާ އަދަދެކެވެ.
ކޯވިޑާއި ދެކޮޅަށް ދުނިޔޭގެ ގައުމުތަކުން ކުރަމުން އަންނަ ހަގުރާމާއިގައި އެންމެ ބޮޑު ކާމިޔާބެއް ހޯދާފައިވާ އެއްގައުމަކީ ޗައިނާއެވެ. މިއަހަރު ޖޫންމަހު ޗައިނާއިންވަނީ 20 މިލިއަން މީހުން ދިރިއުޅެމުންދާ އެގައުމުގެ ވެރިރަށް ބޭޖިންގެ ބޮޑު ސަރައްހައްދެއް ލޮކްޑައުންކޮށް، ފުޅާ ދާއިރާއެއްގައި ކޯވިޑަށް ޓެސްޓުކޮށް ބަލި ފެތުރުން ކޮންޓްރޯލް ކޮށްފައެވެ. ކޯވިޑް އެންމެ ފުރަތަމަ ދުނިޔޭގައި ފެތރުރެންފެށީ ބޭޖިންގެ ސަރަހައްދެއްގެ ފުޑް މާރުކޭޓަކުންނެވެ.
ޗައިނާގައި މިހާތަނަށް އައިއިރު 85578 މީހުން ކޮވިޑަށް ޕޮޒިޓިވްވެ، 4634 މީހުން ވަނީ މިބލީގައި މަރުވެފައެވެ.
ކޮމެންޓު ފޮނުވާ