"ދަ ކަޕިލް ޝަރްމާ ޝޯވ"ގެ ތްރޯބެކް ވީޑިއޯއެއްގައި އެކްޓަރު އަކްޝޭ ކުމާރުގެ ފުރަތަމަ ލޯބި ވެރިޔާ އޭނާ ދޫކޮށްދިޔަ ސަބަބުގެ ވާހަކަ އަނެއްކާވެސް މީޑިއާގެ ސަމާލުކަމަށް މިވަނީ އައިސްފައެވެ.
އެ ވީޑިއޯގައި އަކްޝޭ ބުނަނީ ފުރަތަމަ ލޯބިވެރިޔާ އޭނާ ދޫކޮށްދިޔައީ އޭނާގެ ލަދުރަކި ކަމުގެ ސަބަބުންނެވެ.
"ކަޕިލް ޝަރްމާ ޝޯވ"އަށް "ހައުސްފުލް 4″ ގެ ޓީމާއިއެކު އައިސް އަކްޝޭވަނީ އަންހެންކުއްޖަކު އޭނާ ރިޖެކްޓުކުރިކަމުގެ ވާހަކަ ކިޔައިދީފައެވެ. އެހާދިސާ ހަނދާންކުރަމުން އަކްޝޭ ކިޔައިދީފައިވަނީ އެކުއްޖާއާއެކު 3 ނުވަތަ 4 ވަރަކަށް ފިލްމު ބެލުމަށާއި ރެސްޓޯރެންޓުތަކަށް ޑޭޓަށް ދިޔައިންކަމަށާއި އެހުރިހާކަމެއްގެ ފަހުންވެސް އޭނާ ދޫކޮށް ދިޔައީކަމަށެވެ.
View this post on Instagram
އަކްޝޭ ބުނީއޭރު އޭނާ ވަރަށް ލަދުގަންނަކަމަށާއި އެހެންކަމުން ދުވަހަކުވެސް ކޮނޑަށް އަތްލައި އަތުގައި ހިފާ އެކަހަލައެއްވެސް ކަމެއް ނުކުރަންކަމަށެވެ. ނަމަވެސް އެކުއްޖާ ބޭނުންވީ ވަރަށް ގާތްކޮށް އުޅެންކަމަށެވެ. އެހެންކަމުން އަކްޝޭއަށް އެގޮތަށް އުޅެން ނުކެރުމުން އަންހެންކުއްޖާ އޭނާ ދޫކޮށް ދިޔައީ ކަމަށް އަކްޝޭ ބުންޏެވެ. އެ ހާދިސާއިން ފިލާވަޅެއް ލިބުންތޯ ކަޕިލް ސުވާލުކުރުމުން އަކްޝޭ ބުނެފައިވަނީ އެ ހާދިސާއަށްފަހު ޔޫޓާންއެއްނަގައި މުޅި މީހާ ބަދަލުވީކަމަށެވެ.
މި ހަފްތާގެ އާދިއްތަ ދުވަހު އަކްޝޭ ކުމާރު ވަނީ އޭނައާއި ޓުވިންކަލްގެ ކައިވެންޏަށް 20 އަހަރުގެ އެނިވާސަރީގެ ތަހުނިޔާ ކިޔުމަށް އިންސްޓަގްރާމުގައި ޕޯސްޓެއް ހިއްސާކޮށްފައެވެ. އެދެމީހުންގެ ފޮޓޯއާއެކު ކުރި މި ޕޯސްޓުގައި ލިޔެފައިވަނީ ކައިވެންޏަށް 20 އަހަރު ވީނަމަވެސް ޓުވިންކަލް ފެންނަކޮންމެ ފަހަރަކު ހިތްތެޅޭކަމަށާއި ނަމަވެސް ބައެއްފަހަރު ރުޅިއަރުވާފައި ހެއްވާލާނެކަމަށެވެ.
View this post on Instagram
އަކްޝޭ ކުމާރު އެންމެ ފަހުން ފެނިގެންގޮސްފައިވަނީ ބިރުވެރި މަޖާ ފިލްމު "ލަކްސްމީ" އިންނެވެ. އަދި "ސޫރިޔާވަންޝީ"، "ބަޗަން ޕާންޑޭ"، "ޕްރިތްވިރާޖް"، "އަތުރަންގީ ރޭ"، "ރަކްޝާ ބަންދަން" އަދި "ރާމް ސޭތޫ" ފަދަ ގިނަ ފިލްމުތައް އަދިވެސް ކުރިއަށް އެބައޮތެވެ.
