ދަ ގްރާންޑޭން ޔޫވީ ބަލިކޮށްފި

ދިރާގު ދިވެހި ޕްރިމިއާ ލީގުގައި ދަ ގްރާންޑޭ އިން 2-1 ލަނޑުން ޔުނައިޓެޑް ވިކްޓްރީ (ޔޫވީ) ބަލިކޮށްފި އެވެ.

މެޗު ފަށައިގެން ފުރަތަމަ 14 މިނިޓް ތެރޭ ޔުނައިޓެޑް ވިކްޓްރީގެ އަލީ ހައިޝަމް (ޗުމްޕު) އަށް ގޯލު ޖަހަން ރަނގަޅު ދެ ފުރުސަތެއް ލިބިގެންދިޔަ އެވެ. ދަ ގްރާންޑޭ އިން ލީޑުނެގީ މެޗުގެ 23 ވަނަ މިނިޓްގައި އެ ޓީމުގެ ކެޕްޓަން ޔަސްފާދު ހަބީބު (މުލަކޭ) ޖެހި ގޯލުންނެވެ. ބޯޅަ ހިފައިގެން އޭރިއާތެރެއަށް ވަދެ މުލަކޭ ޖެހި ބޯޅަ ތިރިތިރިން ގޮސް އަމާޒުވީ ގޯލުގެ ކަނަށެވެ.

ދެ ވަަނަ ހާފު ފަށައިގެން ޔުނައިޓެޑް ވިކްޓްރީން ކުޅުން ރަނގަޅުކޮށް ނަތީޖާ ހަމަހަމަކުރި އެވެ. މެޗުގެ 55 ވަނަ މިނިޓްގައި އީސަ ދިން ބޯޅައަކުން ޔުނައިޓެޑް ވިކްޓްރީގެ ގޯލު ޖެހީ ހައިޝަމް އެވެ. އޭގެ ފަހުން ޔުނައިޓެޑް ވިކްޓްރީން ލީޑުނަގަން ލިބުނު ދެ ފުރުސަތެއް ނަގާލި އެވެ. ފުރަތަމަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި އަޔާ ދަ ގްރާންޑޭ މޮޅުކޮށްދިން ގޯލު ޖެހީ މެޗުގެ 87 ވަނަ މިނިޓްގަ އެވެ. އޭރިއާތެރެއިން ދަ ގްރާންޑޭގެ އުޒްބެކިސްތާން މިޑްފީލްޑަރު އުމަރުޔޯނޯފް އަހްރޯރް ދިން ބޯޅަ އަޔާ ވަނީ ހަމަޖެހިލާފައި ގޯލުގެ ތެރެއަށް ފޮނުވާލައިފަ އެވެ.

އިތުރު ވަގުތުގެ ފަހު ސިކުންތުކޮޅުގެ ތެރޭގައި ދަ ގްރާންޑޭ އަށް ތިން ވަނަ ލަނޑެއް ޖަހަން ރަނުގެ ފުރުސަތެއް ލިބުނެވެ. އަޔާ އަށް ކުރި ފައުލަކަށް ރެފްރީ ދިން ޕެނަލްޓީ އަހްރޯރް ފޮނުވާލި ނަމަވެސް އެ ބޯޅައިގައި ބާރެއް ނެތި އަމާޒުވީ ޔުނައިޓެޑް ވިކްޓްރީގެ ކިރްގިސްތާން ކީޕަރު ރުސްލާން އާމިރޯފް އަތަށެވެ.

މި މޮޅާ އެކު ދަ ގްރާންޑޭ އިން ފުރަތަމަ ބުރު ނިންމާލީ ތިން ވަނާގަ އެވެ. ދެ ވަނާގަ އޮތް ވެލެންސިއާ އާއި ދަ ގްރާންޑޭ އަށް ވެސް ހަތް މެޗުން ލިބުނީ 12 ޕޮއިންޓެވެ. ވެލެންސިއާ ކުރީގައި އޮތީ ލަނޑުގެ ތަފާތުންނެވެ.