އިސްރާއީލު ސިފައިންގެ ދެ މީހަކު މަރާލުމާއި ގުޅިގެން ހުޅަނގު އައްސޭރި ފުރަބަންދުކޮށް، ހާހެއްހާ ޗެކްޕޮއިންޓު ގާއިމްކޮށްފި

އަލް-ޚަލީލު ސަރަހައްދުގައި ދިން ހަމަލާއެއްގައި އިސްރާއީލުގެ ދެ ސިފައިން މަރުވުމާ ގުޅިގެން، މުޅި ހުޅަނގު އައްސޭރި ފުރަބަންދުކުރުމަށް ބޮޑުވަޒީރު ބެންޖަމިން ނަތަންޔާހޫ ހުކުރު ދުވަހު އަމުރުކުރުމުން، އެ ސަރަހައްދުގެ ގާތްގަނޑަކަށް 1،000 ޗެކްޕޮއިންޓާއި ގޭޓު ބަންދުކުރަން ފަށައިފި އެވެ. އަމުރު ނެރުނީ، ތެލެމް ޔަހޫދީ އާބާދީ ކައިރީގައި ހުރި ރިޒާވް ބެޓަލިއަނަކަށް ހަމަލާދިން ދެ ފަލަސްތީނު މީހަކު މަރާލި ކަމަށް އިސްރާއީލު އަސްކަރިއްޔާއިން ހާމަކުރިތާ ކުޑައިރުކޮޅަކުންނެވެ. ހަމަލާގައި ފަސް ސިފައަކު ޒަޚަމުވެ، އޭގެ ތެރެއިން ދެ މީހުން ފަހުން މަރުވި އެވެ.

އަމުރު ނެރުމާއެކު، ހުޅަނގު އައްސޭރީގެ އުތުރުގައިވާ ނާބްލުސް، ޖަނީން، ޠޫބާސް އަދި ޤަލްޤީލިޔާ ހިމެނޭ ސަރަހައްދުތަކުގެ ގާތްގަނޑަކަށް 15 ރަށަކަށް ސިފައިން ވަދެ، ގެތައް ބަލައިފާސްކޮށް ގިނަ ބަޔަކު ހައްޔަރުކުރި އެވެ. އަރީޙާ ސިޓީއާއި ޢަޤަބަތު ޖަބްރު ރެފިއުޖީ ކޭމްޕަށް ވެސް ސިފައިން ވަދެފައިވެ އެވެ.

އަލް-ޚަލީލުގައި ބުލްޑޯޒަރުން ތިން ފަންގިފިލާގެ އިމާރާތެއް ބިންމަތިކުރިއިރު، އެތާ ދިރިއުޅުނު އާއިލާތަކަށް މުދާ ނެރެން ދިނީ ހަމައެކަނި ފަސް މިނެޓެވެ. ޢައިނު ދައިރު ބަޙާ ސަރަހައްދުން އެތައް ސަތޭކަ އާއިލާއެއް ގެދޮރު ދޫކޮށް ދިއުމަށް ވެސް މަޖުބޫރުކޮށްފައިވެ އެވެ. ހަމަލާގެ ތުހުމަތުކުރެވޭ ބަޔަކު ރަށްގެ ގެއެއް ސިފައިން ވަށާލާފައިވާއިރު، އަލް-ޚަލީލުގެ އޮޕަރޭޝަން ގިނަ ދުވަސްތަކަކަށް ދެމިގެންދާނެ ކަމަށް އަސްކަރިއްޔާއިން ބުނެފި އެވެ.

މި ހާދިސާއާ ގުޅިގެން، އިސްރާއީލުގެ ޤައުމީ ސަލާމަތީ ވަޒީރު އިތަމާރު ބެން-ގްވީރު ވަނީ މުޅި ހުޅަނގު އައްސޭރީގެ ފުރިހަމަ ކޮންޓްރޯލު އިސްރާއީލުން އަތުލުމަށް ގޮވާލާފަ އެވެ. ޕަލަސްތީނިޔަން ނޭޝަނަލް އިނީޝިއޭޓިވްގެ ސެކްރެޓަރީ ޖެނެރަލް މުޞްޠަފާ ބަރުޣޫޘީ ވިދާޅުވީ، ފުރަބަންދުގެ ސަބަބުން ކޮންމެ ސިޓީއަކާއި އަވަށެއް ކުޑަ ޖަލަކަށް ބަދަލުވެ، ސިއްހީ ފަރުވާއާއި އިގުތިސާދާއި ތަޢުލީމަށް ހުރަސްއެޅިފައިވާ ކަމަށާއި، އާންމުންނަށް ދޭ މި ޖަމާޢީ އަދަބުގެ ސަބަބުން ހާލަތު ފަޅައިގެން ދިއުމުގެ ނުރައްކާ އޮތް ކަމަށެވެ.

މި ހާދިސާތައް ހިނގަމުންދަނީ އަންގާރަ ދުވަހު ބާއްވާ އިސްރާއީލުގެ ބަރުލަމާނީ އިންތިޚާބާ ދިމާކޮށް، ހުޅަނގު އައްސޭރީގައި ޒައިތޫނި ބިންނަ ދަނޑުވެރިންނަށް ދޭ ހަމަލާތައް އިތުރުވެފައިވާ ދަނޑިވަޅެއްގަ އެވެ. ބައިނަލްއަޤުވާމީ ޤާނޫނުގެ ދަށުން، ހުޅަނގު އައްސޭރީގައި އިސްރާއީލުން ގާއިމުކޮށްފައިވާ ހުރިހާ ޔަހޫދީ އާބާދީއަކީ ވެސް ޣައިރުޤާނޫނީ އާބާދީތަކެކެވެ.

މަސްދަރު: އަލް ޖަޒީރާ