މާލޭގެ ގެއަކުން ބަނގުރާ ކަމަށް ބެލެވޭ އެއްޗެއް ހުރި ސާސްތިންސަތޭކަ ފުޅިއާ ވުރެ ގިނަ ފުޅި ހޯދައި، ބަނގުރަލުގެ ވިޔަފާރިކުރި ތުހުމަތުގައި ދެ ބިދޭސީއަކު ފުލުހުން ހައްޔަރުކޮށްފިއެވެ.
ހައްޔަރުކުރެވުނީ 44 އަހަރުގެ އިންޑިއާ ރައްޔިތު ޕެރުމަލް މަޔަވަންއާއި 35 އަހަރުގެ ސްރީލަންކާ ރައްޔިތު ތުވަން ރިސްލިން ފަލީލްއެވެ. މި ދެ މީހުން ހައްޔަރުކުރީ ވޭތުވެދިޔަ ބުރާސްފަތި ދުވަހު، ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނެއްގައެވެ.
ގެ ބަލައިފާސްކުރިއިރު 500 އެމްއެލްގެ 1،677 ފުޅިއާއި ފަސް ލީޓަރުގެ 23 ފުޅި ފެނިފައިވާއިރު، މަސްތުވާތަކެތި ކަމަށް ބެލެވޭ އެއްޗެއް ހުރި ދެ ރަބަރު ޕެކެޓު ވެސް ފެނިފައިވާ ކަމަށް ފުލުހުން ބުނެއެވެ.
ދެ މީހުންގެ މައްޗަށް ތުހުމަތުކުރެވެނީ ގަވާއިދާ ހިލާފަށް ބަނގުރާ ގެންގުޅެ ވިޔަފާރިކުރުމާއި، މަސްތުވާތަކެތި އަދި ބަނގުރާ ބޭނުންކުރުމެވެ. އިޖުރާއަތްތައް ނިމުމުން، އިމިގްރޭޝަން ގާނޫނުގެ ދަށުން ފިޔަވަޅު އެޅުމަށް ދެ މީހުން ވެސް މޯލްޑިވްސް އިމިގްރޭޝަނާ ހަވާލުކޮށްފައިވާއިރު، މައްސަލައިގެ ތަހުގީގު ކުރިއަށް ގެންދަމުންދެއެވެ.
މި ފަހަކަށް ބަނގުރަލުގެ މައްސަލަތަކުގައި ހައްޔަރުކުރެވޭ ބިދޭސީންގެ އަދަދު އިތުރުވެފައިވާއިރު، އޭގެ ތެރޭގައި އެންމެ ގިނައީ ބަންގްލަދޭޝް ރައްޔިތުންނެވެ.
ކޮމެންޓު ފޮނުވާ