މަދީނާގައި ހުރި، މަސްޖިދުއްނަބަވީއަށް ކަރަންޓު ފޯރުކޮށްދޭ މައި މަރުކަޒަށް އަންގާރަ ދުވަހު ޑްރޯން ޙަމަލާއެއް ދީފައިވާ ކަމަށާއި، އެ ޙަމަލާގެ ފަހަތުގައި ޔަމަނުގެ ޙޫޘީން ޖަމާޢަތް ހުރިކަން ކަށަވަރުވެފައިވާ ކަމަށް ސަޢޫދީ ޢަރަބިއްޔާ އިސްވެ ހުންނަ އަސްކަރީ އިއްތިޙާދުން ބުނެފިއެވެ.
އިއްތިޙާދުން ބުނާ ގޮތުގައި ޙަމަލާގައި ޓްރާންސްފޯމަރެއް ބޭނުން ނުކުރެވޭ ވަރަށް ގެއްލުން ލިބުނު ނަމަވެސް، ކަރަންޓު ވިއުގައަށް އެއްވެސް އަސަރެއް ކޮށްފައެއް ނުވެއެވެ. ވައްޓާލި ޑްރޯންގެ ބައިތައް ތަޙްޤީޤުކުރުމުން ޙޫޘީން ބައިވެރިވިކަން ސާބިތުވެފައިވާ ކަމަށާއި، މިއީ ދެ ޙަރަމްފުޅަށް ނުރައްކާކޮށް މުސްލިމުންގެ ޖަޒުބާތާ ކުޅެން ހިންގާ ޢަމަލެއް ކަމަށް އިއްތިޙާދުން ސިފަކުރިއެވެ.
ނަމަވެސް ޙޫޘީންގެ ޢަސްކަރީ ތަރުޖަމާނަކު ސަބާ ނޫހަށް ވިދާޅުވީ މިއީ އަސާސެއް ނެތް ތުހުމަތުތަކެއް ކަމަށާއި، މުޤައްދަސް އެއްވެސް ތަނަކަށް ޙަމަލާދިނުމުގެ ވިސްނުމެއް ނެތް ކަމަށެވެ.
މި ހާދިސާއާ ގުޅިގެން ސަޢޫދީ އިއްތިޙާދުން ޞަންޢާގެ އަސްކަރީ އަމާޒުތަކަށް ވައިގެ ޙަމަލާތައް ދީފައިވާއިރު، ސަޢޫދީގެ ދެކުނަށް ޙޫޘީން ފޮނުވި ބެލިސްޓިކް މިސައިލެއްވެސް ވައިގެ ތެރޭގައި ވައްޓާލާފައިވެއެވެ. 2022 ވަނަ އަހަރު އދ ގެ މެދުވެރިކަމުގައި ސުލްޙަ ޤާއިމުކުރުމަށްފަހު ދިމާވި އެންމެ ބޮޑު ކުރިމަތިލުންތަކުގެ ތެރޭގައި ހިމެނޭ މި ހަމަނުޖެހުން އަލުން ހޫނުވާން ފެށީ މިއަހަރުގެ ޖުލައި މަހުއެވެ.
ކޮމެންޓު ފޮނުވާ