ބްލޮގަރު ޔާމީން ރަޝީދު ޤަތުލުކުރި މައްސަލާގެ އަޑުއެހުންތައް ކްރިމިނަލް ކޯޓުގައި މިއަދު ނިމިއްޖެއެވެ. މައްސަލަ ބައްލަވާ ފަނޑިޔާރުންގެ ބެންޗުން އިއުލާން ކުރެއްވި ގޮތުގައި، ދެން އޮންނާނީ ހުކުމް އިއްވުމެވެ.
މިއަދު ބެލީ ކުރިން ކުށް ސާބިތުނުވެ، ހައި ކޯޓުގެ އަމުރަކަށް އަލުން ބަލަމުންދާ މ. ތާއިފް އިސްމާއިލް ރަޝީދާއި ގދ. ގައްދޫ ސިންދުބާދުގޭ މުހައްމަދު ދިފްރާންގެ މައްސަލައެވެ. ދައުލަތުން ބުނީ ހަމަލާދިން ރޭ ސައިކަލެއްގައި މަޑުކޮށްގެން ހުރެ، ހަމަލާދިން މީހަކު ގޮވައިގެން ދިޔައީ އިސްމާއިލް ކަމަށާއި، ޤަތުލުގެ މަޝްވަރާތަކުގައިވެސް އޭނާ ބައިވެރިވި ކަމަށެވެ. ދިފްރާން ޔާމީނަށް ފާރަލުމުގައި ބައިވެރިވިކަން ފުޓޭޖުތަކުން ދޭހަވާ ކަމަށްވެސް ދައުލަތުން ބުންޏެވެ.
ނަމަވެސް ދިފާއީ ވަކީލު ވިދާޅުވީ، ސިއްރު ހެކިން ހެކިބަސް ދީފައިވަނީ ގަބޫލުކުރާ ކުރުމެއްގެ ދަށުން، ދައުލަތުން ބުނެދިން ގޮތަށް ކަމަށާއި، ދިފާއުގެ ސުވާލުތަކަށް ޖަވާބުދޭން އެމީހުން ދެކޮޅުހެދި ކަމަށެވެ. ހުށަހެޅި ވީޑިއޯ ސްނެޕްޝޮޓްތައް މީހުން ދެނެގަނެވޭ ވަރަށް ސާފު ނޫން ކަމަށާއި ފުލުހުންގެ ފަރުވާކުޑަކަން ފާހަގަކުރައްވައި، ދެ މީހުން ކުށުން ބަރީއަކޮށްދިނުމަށް ވަކީލު އެދިވަޑައިގެންނެވިއެވެ.
2017 ވަނަ އަހަރުގެ އެޕްރީލް މަހު، ޔާމީން ދިރިއުޅުނު ގޭގެ ސިޑިގޮޅީގައި ތޫނު އެއްޗެހިން ހަމަލާދީ މަރާލި މި މައްސަލާގައި ފުރަތަމަ ދައުވާކުރީ ހަ މީހެއްގެ މައްޗަށެވެ. އޭގެ ތެރެއިން ހ. އަންނާރުމާގޭ އިސްމާއިލް ހައިޝަމް ރަޝީދާއި މ. އިރަސްމިކުގޭ އަހުމަދު ޒިހާން އިސްމާއިލަށް 2022 ވަނަ އަހަރު އުމުރަށް ޖަލަށްލާން ހުކުމްކުރި ނަމަވެސް، އިސްތިއުނާފުގައި ހައި ކޯޓުން އެ މައްސަލަ އަލުން ބަލަން އަމުރުކުރިއެވެ. އެ ދެ މީހުންގެ މައްސަލާގެ އަޑުއެހުންތައް ކުރިން ނިމިފައިވާތީ، ދެން ހުކުމް އިއްވާނީ ހަތަރު މީހުންގެ މައްޗަށެވެ.
މި މައްސަލަ ބައްލަވަނީ ގާޒީ އިބްރާހިމް އިހްސާނުގެ ރިޔާސަތުގައި، ގާޒީ މުހައްމަދު މިސްބާހާއި ގާޒީ އަލީ ނަދީމް ހިމެނިވަޑައިގަންނަވާ ބެންޗަކުންނެވެ.
ކޮމެންޓު ފޮނުވާ