ރާއްޖޭގެ ޖަލުތައް ކުރިއަށް އޮތް ފަސް އަހަރުގެ ތެރޭގައި ބައިނަލްއަޤުވާމީ މިންގަނޑުތަކާ އެއްގޮތްވާ އިޞްލާޙީ މަރުކަޒުތަކަކަށް ބަދަލުކުރާނެ ކަމަށް ދާޚިލީ ސަލާމަތާއި، މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙުސާން ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމްގެ "އަހާ" ފޯރަމްގައި ރައްޔިތަކު ކުރި ސުވާލަކަށް ޖަވާބުދެއްވަމުންނެވެ.
ވަޒީރު ވިދާޅުވި ގޮތުގައި، ސަރުކާރު ހަވާލުވިއިރު ޖަލުތަކުގައި ހުރީ ވަރަށް މަދު ޖާގައެކެވެ. މިހާތަނަށް ގާތްގަނޑަކަށް 400 ޖާގަ އިތުރުކޮށްފައިވާއިރު، މި މަސް ނިމުމުގެ ކުރިން އިތުރު 100 ޖާގަ ހަމަޖެހޭނެއެވެ. ޖާގަ އިތުރުކުރަނީ ރައްޔިތުން ގައިދުކުރުމަށް ނޫން ކަމަށާއި، ރިހެބިލިޓޭޓްކޮށް މުޖުތަމަޢަށް ނެރެންޖެހޭ މީހުންނަށް ޖާގަ ހުންނަން ޖެހޭތީ ކަމަށް ވަޒީރު ވިދާޅުވިއެވެ.
ކުރިން ގިނަ ގޮޅިތަކުގައި ކަރަންޓާއި ވައި ދައުރުކުރުމުގެ އިންތިޒާމު ނެތް ނަމަވެސް، މިހާރު ހުރިހާ ގޮޅިއެއްގައި އެ ޚިދުމަތް ހަމަޖައްސާފައިވާ ކަމަށާއި، ބައެއް ގޮޅިތަކުގައި އޭސީވެސް ބަހައްޓާފައިވާ ކަމަށް ވަޒީރު ވިދާޅުވިއެވެ. ރައީސް ޑރ. މުޙައްމަދު މުޢިއްޒުގެ ޒަޢާމަތު ކުރިއަށް ދިޔަނަމަ، ގައިދީންނާއި ކުށުގެ މާހައުލުގައި ތިބޭ މީހުންގެ އަދަދު ދުވަހުން ދުވަހަށް މަދުވާނެ ކަމުގެ ޔަޤީންކަން ވަޒީރު ދެއްވިއެވެ.
މޯލްޑިވްސް ކަރެކްޝަނަލް ސަރވިސްއިން ވަނީ މިހާތަނަށް 370 އެނދު ޤާއިމުކޮށްފައިވާ ކަމަށާއި، މި ދައުރުގައި 500 އެނދަށް ޖާގަ އިތުރުކުރުމަކީ އަމާޒު ކަމަށް ބުނެފައެވެ. ޖަލުތަކުގެ މައްސަލައަށް ދާއިމީ ހައްލެއްގެ ގޮތުން "ވަން ޕްރިޒަން ކޮންސެޕްޓް" ގެ ދަށުން، ހުރިހާ ޚިދުމަތެއް އެއް ތަނަކުން ލިބޭނެ ޒަމާނީ މަރުކަޒީ ޖަލެއް އުތުރު ތިލަފަޅުގައި ތަރައްޤީކުރުމަށް ސަރުކާރުން ރާވަމުންދެއެވެ.
ކޮމެންޓު ފޮނުވާ