އީރާނުން ދެމުންދާ ވޭންދެނިވި ހަމަލާތަކުގެ ސަބަބުން މެދުއިރުމަތިން ފައިބައިގަންނަން އެމެރިކާއަށް މަޖުބޫރުވާނެ ކަމަށް އީރާނުގެ ސުޕްރީމް ލީޑަރު މުޖުތަބާ ޚާމަނާއީ ވިދާޅުވެއްޖެ އެވެ.
އީރާނުގެ ދައުލަތުގެ ޓީވީން ގެނެސްދިން ހިތާބެއްގައި މުޖުތަބާ ވިދާޅުވީ، ހޮރްމޫޒް ކަނޑުއޮޅި ދިފާއުކުރަމުން ދާ މުޖާހިދުންގެ ހަމަލާތަކުގެ ސަބަބުން ދުޝްމަނުން މިހާރު އަރަބި ކަނޑަށް ވަދެގަތުމަށް ވެސް ބިރުގަންނަ ކަމަށާއި، އެކަމަށް އުޅުނު ކޮންމެ ފަހަރަކު ވެސް އެ މީހުންނަށް ބޮޑު ގެއްލުން ލިބުނު ކަމަށެވެ. އަރަބި ކަނޑުން ވެސް އެމެރިކާގެ ބާރު ނެތިގެންދާ ދުވަސް ކައިރިވެއްޖެ ކަމަށް ވެސް އޭނާ ވިދާޅުވި އެވެ.
ފެބްރުއަރީ މަހުގެ ފަހުކޮޅު ހަނގުރާމަ ފެށުނު ފަހުން އާންމުކޮށް ފެނިވަޑައިނުގަންނަވާ މުޖުތަބާގެ މި ބަޔާން ނެރުނީ، ސުލްހަ މަޝްވަރާ އަލުން ފެށުމަށް މަސައްކަތްކުރަމުން ދާ ވަގުތެއްގަ އެވެ.
އެމެރިކާ އާއި އިޒްރޭލުން އީރާނަށް ހަމަލާދިނުމާ އެކު ފެށުނު މި ހަނގުރާމާގައި، ދުނިޔޭގެ ތެލާއި ގޭހުގެ ފަހެއްކަ ބައެއް ދަތުރުކުރާ ހޮރްމޫޒް ކަނޑުއޮޅީގެ ވެރިކަމަށް ދެ ޤައުމު ވާދަކުރަމުން ދަނީ އެވެ. އީރާނުން ކަނޑުއޮޅި ބަންދުކުރުމުން، ރައްދުގައި އެމެރިކާއިން ވަނީ އީރާނުގެ ބަނދަރުތައް ބަންދުކޮށްފަ އެވެ. — އޭއެފްޕީ
ކޮމެންޓު ފޮނުވާ