ވައި ސާފުކުރުމަށް ދިއްލީގައި ހަ ހަފުތާއަށް އިމާރާތްކުރުމުގެ މަސައްކަތް މަނާކުރަނީ

ފިނިމޫސުމު ކައިރިވަމުން އަންނައިރު، ވައި ނުސާފުވުމުގެ މައްސަލަ ކުޑަކުރުމަށްޓަކައި ޑިސެމްބަރު 10 އިން ފެށިގެން ޖެނުއަރީ 20 ގެ ނިޔަލަށް ދިއްލީގައި އިމާރާތްކުރުމުގެ ހުރިހާ މަސައްކަތެއް ހުއްޓާލަން އިންޑިއާގެ ވެރިރަށުގެ ސަރުކާރުން ނިންމައިފި އެވެ.

މި ނިންމުމަކީ ވިންޓާ އެކްޝަން ޕްލޭންގެ ދަށުން އަޅާ ފިޔަވަޅެކެވެ. އެ ޕްލޭނުގައި ދުއްވާ ފަސްދޫޅި ކޮންޓްރޯލްކުރުމާއި، މީހުން އާންމު ދަތުރުފަތުރުގެ ވަސީލަތްތަކަށް ބަދަލުވުމަށް ހިތްވަރުދިނުން ވެސް ހިމެނެ އެވެ. މީގެ އިތުރުން، ނޮވެމްބަރު 1 އިން ފެބްރުއަރީ 28 އަށް އޮފީސްތަކުގެ ގަޑިތައް ބަދަލުކޮށް، އަމިއްލަ އުޅަނދުތައް މަދުކުރުމަށް ޕާކިން ފީ ދެގުނަ ކުރުމަށް ވެސް ނިންމާފައިވެ އެވެ.

ދިއްލީގެ އެންވަރަމަންޓް މިނިސްޓަރު މަންޖިންދަރު ސިންގް ސިރުސާ ވިދާޅުވީ، ފިނިމޫސުމު ފެށުމުގެ ކުރިން ވަރުގަދަ ފިޔަވަޅުތައް އެޅުމަކީ ވައި ނުރައްކާތެރި ހާލަތަށް ދިއުމުން ހުއްޓުވުމަށް ކުރަންޖެހޭ މުހިންމު ކަމެއް ކަމަށެވެ.

30 މިލިއަނަށްވުރެ ގިނަ މީހުން ދިރިއުޅޭ ދިއްލީއަކީ ދުނިޔޭގެ އެންމެ ވައި ނުސާފު ސިޓީތަކުގެ ތެރޭގައި ހިމެނޭ ތަނެކެވެ. ފިނިމޫސުމުގައި ތަޣައްޔަރު ވައި ބިމާ ކައިރީގައި ހިފެހެއްޓޭތީ ހާލަތު އިތުރަށް ދަށްވެ އެވެ. ދަ ލެންސެޓް ޖާނަލުގެ ދިރާސާއަކަށް ބިނާކޮށް، 2009 އާއި 2019 އާ ދެމެދު ނުސާފު ވައީގެ ސަބަބުން އިންޑިއާގައި 3.8 މިލިއަން މީހުން މަރުވެފައިވާއިރު، ދިއްލީގެ ވައީގައި ހުންނަ ޕީއެމް 2.5 ގެ މިންވަރަކީ ޑަބްލިއުއެޗްއޯގެ މިންގަނޑަށްވުރެ ގާތްގަނޑަކަށް 20 ގުނަ ބޮޑު މިންވަރެކެވެ. – އޭއެފްޕީ