ޖަޕާނުގެ އެންމެ އާ "އީ.10″ ޝިންކަންސެން ޓްރެއިންތަކާ ހަމައަށް ވާދަކުރެވޭނެ ބުލެޓް ޓްރެއިނެއް، ގައުމުގެ އަމިއްލަ ޓެކްނޮލޮޖީ ބޭނުންކޮށްގެން އުފެއްދުމުގެ މަސައްކަތް އިންޑިއާ ސަރުކާރުން ރަސްމީކޮށް ފަށައިފި އެވެ. "ބީ.35″ ގެ ނަމުން ނަންދީފައިވާ މި ޓްރެއިނަކީ ގަޑިއަކު 350 ކިލޯމީޓަރުގެ ބާރުމިނުގައި ދުވޭނެ ގޮތަށް ތައްޔާރުކުރާ ޓްރެއިނެއް ކަމަށާއި، 2030 ވަނަ އަހަރާ ހަމައަށް މި ޓްރެއިން ދަތުރުތަކަށް ނެރުމަކީ ސަރުކާރުގެ އަމާޒެވެ.
މި ޓްރެއިން ހެދުމަށް އިންޑިއާއިން ނިންމީ، ކުރިން އެއްބަސްވެފައިވާ "އީ.5″ ޓްރެއިންތައް އުފެއްދުން ޖަޕާނުން ހުއްޓާލުމާއި، އާ އީ.10 ޓްރެއިންތައް ލިބޭނީ 2030 ގެ އަހަރުތަކުގެ ފަހުކޮޅު ކަމުގައި ވުމުން، މަޝްރޫއު ލަސްވުމުން ސަލާމަތްވުމަށެވެ. މި ޓްރެއިން ދުއްވާނީ މުމްބާއީ-އަހުމަދުއާބާދު ހައި-ސްޕީޑް ރެއިލް ކޮރިޑޯގައި ކަމަށާއި، މި މަޝްރޫއުގެ ޖުމްލަ ޚަރަދު 2 ލައްކަ ކްރޯޑް ރުޕީސް ފަހަނައަޅާ ދެއެވެ.
ބީ.35 ގެ ކުރިން، ބެމްލް އާއި އިންޓަގްރަލް ކޯޗް ފެކްޓަރީއިން ގުޅިގެން އުފައްދާ، ގަޑިއަކު 280 ކިލޯމީޓަރުގެ ބާރުމިނުގެ "ބީ.28″ ޓްރެއިނުގެ ޓެސްޓު ދަތުރުތައް 2027 ވަނަ އަހަރު ފަށަން ހަމަޖެހިފައިވެ އެވެ. މި ޓްރެއިންތަކުގައި ބޭނުންކުރާނީ އިންޑިއާއިން އަމިއްލައަށް ތަރައްޤީކުރި "ބާރަތު ޓްރެއިން ކޮންޓްރޯލް ސިސްޓަމް" ގެ ނަމުގައިވާ ސިގްނަލިންގް ނިޒާމެވެ.
ކޮމެންޓު ފޮނުވާ