އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ޔޫއޭއީއަށް ވަޑައިގެން، ޔޫއޭއީގެ ރައީސް މުހައްމަދު ބިން ޒައިދު އަލް ނަހުޔާނާ އާދީއްތަ ދުވަހު ބައްދަލުކުރެއްވިކަން ދެ ގައުމުން ވެސް ރަސްމީކޮށް ހާމަކޮށްފި އެވެ.
މި ބައްދަލުވުމާ ބެހޭ ގޮތުން އިޒްރޭލުގެ މީޑިއާއިން ކުރިން ރިޕޯޓުކުރި އިރު، ނަތަންޔާހޫގެ އޮފީހާއި ޔޫއޭއީގެ ސަރުކާރުގެ މީޑިއާއިން ވަނީ އެ ހަބަރު ތެދުކަން ކަށަވަރުކޮށްދީފަ އެވެ. ދެ ލީޑަރުން ވާހަކަ ދެއްކެވީ ދެ ގައުމުގެ ގުޅުން އިތުރަށް ވަރުގަދަކުރުމާއި، އީރާނާ ގުޅިގެން ހިނގަމުންދާ ހަނގުރާމައިގެ ސަބަބުން ސަރަހައްދަށް ކުރިމަތިވެފައިވާ ގޮންޖެހުންތަކާ ބެހޭ ގޮތުން ކަމަށް ރިޕޯޓުތަކުގައި ބުނެ އެވެ.
އިޒްރޭލުގެ މީޑިއާއިން ބުނާ ގޮތުގައި، ނަތަންޔާހޫ ހިނގާލެއްވި މި ދަތުރުގެ މަގުސަދަކީ 2023 ވަނަ އަހަރު އޮކްޓޫބަރު 7 ގައި ހަމާސްއިން ހަމަލާދިނުމުގެ ކުރިން، ޔޫއޭއީގެ ރައީސް އެކަމުގެ އިންޒާރެއް ނަތަންޔާހޫއަށް ދެއްވި ކަމަށް ބުނާ ރިޕޯޓުތައް ރައްދުކުރުމެވެ. އެފަދަ އިންޒާރެއް ލިބިފައިވާ ކަމަށް ބުނާ ވާހަކަ ނަތަންޔާހޫ ވަނީ ކުރިން ވެސް ދޮގުކުރައްވާފަ އެވެ.
ދަތުރުގެ ހަބަރު ޗެނަލް 12 އިން ފަތުރުމާ ގުޅިގެން، ޝިން ބެއިތުން ވަނީ އެ ޗެނަލާ ދެކޮޅަށް ޗީފް މިލިޓަރީ ސެންސަރަށް ޝަކުވާއެއް ހުށަހަޅާފަ އެވެ. ދަތުރު ނިމުމުގެ ކުރިން ހަބަރު ފެތުރުމުން ނަތަންޔާހޫ، އޭނާގެ އަނބިކަނބަލުން އަދި މޮސާދުގެ ވެރިޔާ ހިމެނޭ ވަފުދުގެ ސަލާމަތަށް ނުރައްކާ ކުރިމަތިވި ކަމަށް ބޮޑުވަޒީރުގެ އޮފީހުން ވިދާޅުވި އެވެ.
2020 ވަނަ އަހަރު ސޮއިކުރި އަބްރަހަމް އެކޯޑްސްގެ ދަށުން އިޒްރޭލާ ރަސްމީ ގުޅުން ގާއިމުކުރި ޔޫއޭއީއަކީ އެމެރިކާގެ ގާތް ބައިވެރިއެކެވެ. އީރާނާ ކުރާ ހަނގުރާމައިގެ ތެރޭގައި އިޒްރޭލުން ވަނީ ޔޫއޭއީގައި އަޔަން ޑޯމް ދިފާއީ ނިޒާމް ވެސް ބަހައްޓާފަ އެވެ.
ކޮމެންޓު ފޮނުވާ