އެމްޑީޕީގެ ކެންޑިޑޭޓަކަށް އެންމެ ގާބިލީ ޝާހިދު: ސަން ޕޯލް

2028 ގެ ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރަން އެންމެ ގާބިލު ކެންޑިޑޭޓަކީ ކުރީގެ ޚާރިޖީ ވަޒީރު އަބްދުﷲ ޝާހިދު ކަމަށް ސަން އޮންލައިންގެ ޕޯލްގައި ބައިވެރިވި ފަރާތްތަކުގެ ދެބައިކުޅަ އެއްބައިއަށް ވުރެ ގިނަ ބަޔަކު ވޯޓުދީފި އެވެ.

ޕޯލްގައި ޝާހިދަށް 58.3 އިންސައްތަ ވޯޓު ލިބުނު އިރު، ދެވަނައަށް އައި ކުރީގެ ރައީސް އިބްރާހީމް މުޙައްމަދު ޞާލިޙަށް ލިބުނީ 16 އިންސައްތަ ވޯޓެވެ. ކުރީގެ ރައީސް މުޙައްމަދު ނަޝީދަށް 13.9 އިންސައްތަ، ޑރ. އަޙްމަދު ޝަމްހީދަށް 6.7 އިންސައްތަ، ފައްޔާޒް އިސްމާއީލަށް 4.9 އިންސައްތަ އަދި ފައިސަލް ނަސީމަށް 0.3 އިންސައްތަ ވޯޓު ލިބިފައިވެ އެވެ.

މަޖިލީހުގެ ކުރީގެ ރައީސް ޝާހިދު، ރައީސް ޞާލިޙުގެ ވެރިކަމުގައި ޔޫއެންގެ ޖެނެރަލް އެސެމްބްލީގެ 76 ވަނަ ސެޝަންގެ ރައީސްކަމުގެ މަޤާމު ވެސް ފުރުއްދަވާފައިވެ އެވެ. މިހާރު ޝާހިދު ގެންދަވަނީ އަންނަ އަހަރު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގަ ވާދަކުރެއްވުމަށް ކެމްޕޭން ކުރައްވަމުންނެވެ.

އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަމަށް ޝާހިދާއި، ޕާޓީގެ ކުރީގެ ޗެއަރޕާސަން ފައްޔާޒް ވަނީ އިޢުލާން ކުރައްވާފަ އެވެ. އޭގެ އިތުރުން ކުރީގެ ނައިބު ރައީސް ފައިސަލް ނަސީމާއި، އެމްޑީޕީގެ ޕާލަމެންޓްރީ ގްރޫޕުގެ މެމްބަރު ޑރ. ޝަމްހީދު ވެސް ޕްރައިމަރީއަށް ތާއީދު ހޯއްދެވުމުގެ މަސައްކަތް ކުރައްވަމުން ގެންދަވަ އެވެ.

ވޯޓުލުން މިހާރު ނިމިފައިވާ މި ޕޯލްގެ ނަތީޖާ sun.mv/polls/11 އިން ބައްލަވާލެއްވޭނެ އެވެ. ޕޯލްގައި ވޯޓުދީފައިވާ ޖުމްލަ އަދަދު ސަން އޮންލައިންއިން އަދި ހާމަކޮށްފައެއް ނުވެ އެވެ.