ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ވަނީ ބައިނަލްއަޤްވާމީ ފުޓްބޯޅައިން ރިޓަޔާވުމަކަށް މިވަގުތު ނުވިސްނާ ކަމަށް ބުނެފައެވެ. ޕޯޗުގަލްގެ ފުޓްބޯޅަ އެސޯސިއޭޝަންގެ ހެޑްކުއާޓަރުގައި ބޭއްވި ފުޓްބޯލް ސަމިޓުގައި މީޑިއާއަށް ވާހަކަދައްކަމުން 41 އަހަރުގެ ރޮނާލްޑޯ ބުނީ، އާ ކޯޗު ޖޯޖް ޖީސަސްގެ ދަށުން ޓީމަށް އެހީތެރިވެދެވޭނެކަމުގެ ފުރިހަމަ ޔަޤީންކަން އޭނާގެ އެބައޮތް ކަމަށެވެ.
މިހާތަނަށް 979 ލަނޑު ޖަހާފައިވާ ރޮނާލްޑޯއަށް 1،000 ލަނޑުގެ ތާރީޚީ އިމާ ހަމައަށް ދާން ބާކީ ވަނީ 21 ލަނޑެވެ. އޭގެ ތެރެއިން 833 ލަނޑު ޖެހީ ކްލަބުތަކަށް ކުޅެގެން ކަމަށްވާއިރު، ޤައުމީ ޓީމަށް ވަނީ 146 ލަނޑު ޖަހައިދީފައެވެ. ނޭޝަންސް ލީގާއި 1،000 ލަނޑު ހަމަކުރުން، މި ދެކަމުން ބޮޑަށް ބޭނުންވަނީ ކޮބައިތޯ ސުވާލުކުރުމުން ރޮނާލްޑޯ ބުނީ ދެކަމަކީވެސް އޭނާގެ އަމާޒު ކަމަށެވެ. "ޤައުމީ ޖާޒީގައި 1،000 ވަނަ ލަނޑު ޖެހުމަކީ ރީތި ވާހަކައެއްގެ ފުރިހަމަ ނިމުމެއް ވާނެ،" އޭނާ ބުންޏެވެ.
ވޯލްޑް ކަޕުން ސްޕެއިން އަތުން ބަލިވުމަށްފަހު ޤައުމީ ޓީމުން ވަކިވުމަށް ވިސްނި ނަމަވެސް، ކޯޗާއި އެސޯސިއޭޝަނާއެކު މަޝްވަރާކުރުމަށްފަހު މަޑުކުރަން ނިންމި ކަމަށް ރޮނާލްޑޯ ވިދާޅުވިއެވެ. ކޯޗު އިތުބާރުނުކުރާ ދުވަހަކު ނުވަތަ ދަނޑުމަތީގައި އަސަރެއް ނުކުރެވޭ ކަމަށް ހީވާ ދުވަހަކު އެންމެ ފުރަތަމަ ޓީމު ދޫކޮށްލާނީ އޭނާ ކަމަށާއި، މީޑިއާއިން ނިންމާލަން އުޅުނަސް އޭނާގެ ކެރިއަރު ނުނިމޭނެ ކަމަށްވެސް ރޮނާލްޑޯ ބުންޏެވެ.
ޖޯޖް ޖީސަސްގެ ދަށުން ޕޯޗުގަލް ކުޅޭ ފުރަތަމަ މެޗު ކަމަށްވާ ވޭލްސްއާ ދެކޮޅު ނޭޝަންސް ލީގު މެޗު ކުޅޭނީ މިރޭ ރާއްޖޭގެ ގަޑިން 23:45 ގައި އެސްޓާޑިއޯ ޖޯސޭ އަލްވާލާޑޭގައެވެ. ޕޯޗުގަލް ޓީމު ފުރިހަމަ ފިޓްނަސްގައި އޮތްއިރު، ވޭލްސްއަށް އަނިޔާގެ ސަބަބުން ހެރީ ވިލްސަން، ނޭތަން ބްރޯޑްހެޑް އަދި ކާލް ޑާލޯ ނުކުޅެވޭނެއެވެ.
ކޮމެންޓު ފޮނުވާ