ފަރަންސޭސިވިލާތުގެ ޤައުމީ ފުޓްބޯޅަ ޓީމުގެ އައު ކޯޗުގެ ގޮތުގައި ހަވާލުވި ޒިނެދިން ޒިދާން، އޭނާގެ ކޯޗުކަމުގެ ދަށުން ފުރަތަމަ ފަރިތަކުރުން ބާއްވައިފިއެވެ.
ރެއާލް މެޑްރިޑްގެ ކޯޗުކަމުން ވަކިވިތާ ފަސް އަހަރު ފަހުން ކޯޗިންގެ ތެރެއަށް އެނބުރި އައި ޒިދާން ފަރަންސޭސި ޓީމާ ހަވާލުވެފައިވަނީ ޑިޑިއަރ ޑެޝޯމްޕް 14 އަހަރުގެ ކާމިޔާބު ދައުރަކަށްފަހު މަގާމުން އިސްތިއުފާ ދިނުމުންނެވެ. ޑެޝޯމްޕްގެ އިރުޝާދުގެ ދަށުން ފަރަންސޭސީން މިއަހަރުގެ ފީފާ ވޯލްޑް ކަޕް ނިންމާލީ ހަތަރުވަނާގައެވެ.
ޒިދާން އެކުލަވާލި 23 ކުޅުންތެރިންގެ ސްކޮޑުގައި ޤައުމީ ޓީމަށް މުޅިން އައު 5 ކުޅުންތެރިއަކު ހިމަނާފައިވެއެވެ. އޭގެތެރޭގައި ޓޮލޫސްގެ ކީޕަރ ގިއޮމް ރެސްޓް، ލޯންސްގެ ކީޕަރ ރޮބިން ރީސަރ، ޑިފެންޑަރ ޖެރެމީ ޖެކީ، އިންޓަރ މިލާންގެ އެންޑީ ޑިއޫފް އަދި ކޯމޯގެ ލޫކަސް ޑި ކުންޔާ ހިމެނެއެވެ. ނަމަވެސް ތަޖުރިބާކާރު މިޑްފީލްޑަރު އެންގޯލޯ ކާންޓޭއަށް ފުރުޞަތު ދީފައި ނުވެއެވެ. ކާންޓޭގެ ޢުމުރު 35 އަހަރަށް އެޅިފައިވާތީ އޭނާ ޓީމަށް ނުނެގުމަކީ އަމިއްލަ ނިންމުމެއް ކަމަށް ޒިދާން ވަނީ ބުނެފައެވެ.
ޒުވާން ކުޅުންތެރިންނަށް އިސްކަން ދޭނެ ކަމަށާއި ޓީމު ބިނާ ކުރާނީ އެ ކުޅުންތެރިންގެ މައްޗަށް ކަމަށް ޒިދާން ފާހަގަކުރިއެވެ. އަދި ކިލިއަން އެމްބާޕޭ ޤައުމީ ޓީމުގެ ކެޕްޓަންކަމުގައި ދެމިހުންނާނެ ކަމަށްވެސް އޭނާ ވަނީ ބުނެފައެވެ.
ޒިދާންގެ ކޯޗުކަމުގައި ފަރަންސޭސީން ފުރަތަމަ ނިކުންނާނީ މިމަހުގެ 25 ވަނަ ދުވަހު ނޭޝަންސް ލީގުގައި ރަށުން ބޭރުގައި ތުރުކީޔޭ އާ ދެކޮޅަށެވެ. މި އިންޓަރނޭޝަނަލް ބްރޭކުގައި ބެލްޖިއަމް އާ ދެކޮޅަށް ދެ މެޗު އަދި އިޓަލީވިލާތާ ދެކޮޅަށް އެއް މެޗު ހިމެނޭ ގޮތަށް އިތުރު ތިން މެޗެއް ފަރަންސޭސީން ކުޅޭނެއެވެ.
ކޮމެންޓު ފޮނުވާ