މިއަހަރުގެ ޖޫން އަދި ޖުލައި މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ދަށަށް ދިއުމަށްފަހު، ނިމިދިޔަ އޮގަސްޓު މަހު ފަތުރުވެރިކަމުގެ ދާއިރާއަށް އުންމީދީ ކުރިއެރުމެއް ލިބިއްޖެއެވެ.
ޓޫރިޒަމް މިނިސްޓްރީގެ އެންމެ ފަހުގެ ތަފާސްހިސާބުތައް ދައްކާގޮތުން، މިދިޔަ މަހު ރާއްޖެއަށް 195,390 ފަތުރުވެރިން ޒިޔާރަތްކޮށްފައިވެއެވެ. މިއީ 2025 ވަނަ އަހަރުގެ އޮގަސްޓު މަހު އައި 192,058 ފަތުރުވެރިންނާ އަޅާބަލާއިރު ފާހަގަކޮށްލެވޭ އިތުރުވުމެކެވެ. ވިޔަފާރި ބޭނުންތަކަށާއި ކްރޫޒް ލައިނަރތަކުގައި އައި މީހުން ހިމަނައިގެން ބަލާއިރު، ޖުމްލަ ޒިޔާރަތްކުރި މީހުންގެ އަދަދު 197,640 އަށް އަރައި، 2.1 ޕަސެންޓުގެ ކުރިއެރުމެއް ވަނީ ހޯދާފައެވެ.
ނަމަވެސް، މިއަހަރުގެ ފުރަތަމަ އަށް މަހުގެ ޖުމްލަ އަދަދުތަކަށް ބަލާއިރު އަދިވެސް އުޅެނީ މިދިޔަ އަހަރަށްވުރެ ދަށްކޮށެވެ. މި މަހުގެ 2 ވަނަ ދުވަހާ ހަމައަށް ޖުމްލަ 1,461,682 މީހުން ޒިޔާރަތްކޮށްފައިވާއިރު، މިއީ މިދިޔަ އަހަރުގެ އެ މުއްދަތާ އަޅާބަލާއިރު 3.7 ޕަސެންޓުގެ ދަށްވުމެކެވެ. ސީދާ ފަތުރުވެރިންގެ ގޮތުގައި އައި މީހުންގެ އަދަދު 1,432,601 ގައި އުޅޭއިރު، މިއީ މިދިޔަ އަހަރުގެ އެ މުއްދަތުގައި އައި 1,496,563 ފަތުރުވެރިންނާ އަޅާބަލާއިރު 4.3 ޕަސެންޓުގެ ދަށްވުމެކެވެ.
ރާއްޖެއަށް އެންމެ ގިނައިން ފަތުރުވެރިން އަންނަ ފަސް ގައުމުގެ ތެރޭގައި އެއްވަނައިގައި އޮތީ ޗައިނާއެވެ. ދެން އެންމެ ގިނައިން ފަތުރުވެރިން އަންނަނީ ރަޝިއާ، އިނގިރޭސިވިލާތް، އިޓަލީ އަދި ޖަރުމަނުވިލާތުންނެވެ.
މިދިޔަ އަހަރު ރާއްޖެއަށް 2.2 މިލިއަން ފަތުރުވެރިން ޒިޔާރަތްކޮށްފައިވާއިރު، މިއަހަރުވެސް އެ އަދަދަށް ފަތުރުވެރިން ގެނައުމަކީ ސަރުކާރުގެ އަމާޒެވެ.
ކޮމެންޓު ފޮނުވާ