ރާއްޖޭގެ ޑިމޮކްރަސީއާއި ދައުލަތުގެ ހިންގުމުގެ ނިޒާމު އިތުރަށް ހަރުދަނާކުރެއްވުމުގެ ގޮތުން، ޒުވާނުންގެ ޚާއްޞަ މަޖިލީހެއް (ޔޫތު ޕާލަމަންޓް) ޤާއިމުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނުކުރައްވައިފިއެވެ.
މިކަން ރައީސުލްޖުމްހޫރިއްޔާ އިޢުލާނުކުރެއްވީ މިނިވަން ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ. ރައީސްގެ ވާހަކަފުޅުގައި، ރާއްޖޭގެ އާބާދީގެ ދެބައިކުޅަ އެއްބަޔަށްވުރެ ބޮޑު އިންސައްތައެއް ޒުވާނުންނާއި އަންހެނުން ހިއްސާކުރާއިރު، ދައުލަތުގެ ހިންގުމުގެ ނިޒާމުގައި އެ ފަރާތްތަކުގެ ބައިވެރިވުން އިތުރުކުރުމަކީ ޑިމޮކްރަސީ ހަރުދަނާކުރުމަށް ކޮންމެހެން މުހިންމު ކަމެއް ކަމަށް ފާހަގަކުރެއްވިއެވެ.
ޒުވާނުންގެ މަޖިލިސް އެކުލެވިގެންވާނެ ގޮތާ ގުޅޭގޮތުން ރައީސް ވިދާޅުވީ، ރައްޔިތުންގެ މަޖިލީހުގެ ހުރިހާ ދާއިރާތައް ހިމެނޭގޮތަށް، ޒުވާނުންގެ ތެރެއިން އިންތިޚާބުކުރެވޭ މެންބަރުންގެ މައްޗަށް އެ މަޖިލިސް އެކުލެވިގެންވާނެ ކަމަށެވެ. މީގެއިތުރުން، ރައްޔިތުންގެ މަޖިލީހުގެ ކޮމްޕޮޒިޝަންގެ ތެރޭގައި ވަކި އިންސައްތައެއް ޒުވާނުންނަށާއި، ވަކި އިންސައްތައެއް އަންހެނުންނަށް ޚާއްޞަކުރުމަށްޓަކައި ޤާނޫނުއަސާސީއަށް ގެންނަންޖެހޭ އިޞްލާޙުތައް ކުރިއަށް އޮތް ދުވަސްތަކުގައި މަޖިލީހަށް ހުށަހަޅުއްވާނެ ކަމަށްވެސް ރައީސް ވިދާޅުވިއެވެ.
ސިޔާސީ ދާއިރާގައި ޒުވާނުންނާއި އަންހެނުން ބާރުވެރިކުރުވުމަށްޓަކައި ޤާނޫނުތަކަށް ގެންނަންޖެހޭ އިޞްލާޙުތައް ގެންނަވާނެ ކަމަށާއި، މި ބަދަލުތަކުގެ މައިގަނޑު މަގްޞަދަކީ ދައުލަތުގެ މިނިވަންކަން ދެމެހެއްޓުމުގައި ޒުވާނުންނާއި އަންހެނުންގެ ދައުރު ފުޅާކުރުން ކަމަށްވެސް ރައީސް ފާހަގަކުރެއްވިއެވެ.
މި ނިންމެވުމާއެކު، ޤައުމުގެ މުހިންމު ނިންމުންތަކުގައި ޒުވާނުންނާއި އަންހެނުންގެ ބަސް އިއްވުމުގެ ފުރުޞަތު އިތުރަށް ތަނަވަސްވެ، ސިޔާސީ މަސްރަޙުގައި އެ ފަރާތްތަކުގެ ދައުރު ފުޅާވެގެންދާނެ ކަމަށް ބެލެވެއެވެ.
ކޮމެންޓު ފޮނުވާ