އިންޑިއާގެ އެޑިއުކޭޝަން މިނިސްޓަރު ދަރުމެންދުރާ ޕްރަދާން އިސްތިއުފާ ދެއްވުމާ ގުޅިގެން، ކޮކްރޯޗު ޖަންތާ ޕާޓީ (ސީޖޭޕީ) ގެ ޒުވާނުން މުޅި އިންޑިއާގައި ކުރިއަށްގެންދިޔަ ހަފުތާތަކެއްވީ މުޒާހަރާތައް މިއަދު ނިންމާލައިފި އެވެ.
ސީޖޭޕީގެ ތަރުޖަމާނު އަޝުތޯޝް ރަންކާ ވިދާޅުވި ގޮތުގައި، ޕާޓީން ހުށަހެޅި ހުރިހާ ޑިމާންޑްތަކެއް ސަރުކާރުން ވަނީ ބަލައިގަނެފަ އެވެ. އެހެންވެ، މުޒާހަރާތަކުގައި ތިބި ބައިވެރިން ސުލްހަވެރިކަމާ އެކު ގެއަށް އެނބުރި ދިއުމަށް އޭނާ ވަނީ އެދިވަޑައިގެންފަ އެވެ. މައި ސަރުކާރުގެ މިނިސްޓަރަކު ވެސް ވަނީ ސީޖޭޕީގެ ޑިމާންޑްތައް ސަރުކާރުން ބަލައިގަނެފައިވާކަން ކަށަވަރުކޮށްދެއްވާފަ އެވެ.
ޕްރަދާން މިއަދު އިސްތިއުފާ ދެއްވަމުން ވިދާޅުވީ، މަގާމުން ދުރުވެވަޑައިގަތީ "ގައުމާ ދެކޮޅު ބާރުތަކުން" މި ހާލަތުގެ ނާޖާއިޒު ފައިދާ ނުނެގުމަށާއި، ގައުމުގެ ޒުވާނުންގެ އިހުސާސްތަކާއި ހައްގު އެދުންތަކަށް އިހުތިރާމުކުރުމުގެ ގޮތުން ކަމަށެވެ.
މިނިސްޓަރު އިސްތިއުފާ ދެއްވިކަން އިއުލާނު ކުރެއްވުމާ އެކު، ނިއު ދިއްލީގެ ޖަންތަރު މަންތަރު މުޒާހަރާ ސަރަހައްދާއި އިންޑިއާގެ އެހެން އަވަށްތަކުގައި ތިބި ތާއީދުކުރާ ފަރާތްތަކުން ވަނީ އުފާ ފާޅުކޮށްފަ އެވެ. ސީޖޭޕީން އެކްސްގައި ކުރި ޕޯސްޓެއްގައި ބުނީ "ކޮކްރޯޗުން ކާމިޔާބު ހޯދައިފި، ޑިމޮކްރެސީ ކާމިޔާބު ހޯދައިފި" ކަމަށެވެ.
މި ހަރަކާތުގައި ފާހަގަކުރެވުނު، މިދިޔަ ހަފުތާގައި 26 ދުވަހުގެ ބަނޑުހައިހޫނުކަމުގެ ހަޅުތާލެއް ނިންމާލި މަޝްހޫރު އެކްޓިވިސްޓް ސޯނަމް ވަންގްޗުކް ސިފަކުރެއްވި ގޮތުގައި، މިނިސްޓަރު އިސްތިއުފާ ދެއްވުމަކީ ސުލްހަ އާއި ކެތްތެރިކަމާއި ސާބިތުކަމުން ހޯދި ކާމިޔާބީއެކެވެ.
ސީޖޭޕީގެ ޑިމާންޑްތަކުގެ ތެރޭގައި ޕްރަދާން މަގާމުން ދުރުކުރުމުގެ އިތުރުން، އިމްތިހާނުތަކާ ގުޅިގެން ދިމާވި މައްސަލަތަކުގެ ސަބަބުން އަމިއްލައަށް މަރުވި ދަރިވަރުންގެ އާއިލާތަކަށް ބަދަލު ދިނުމާއި، މުޒާހަރާތަކުގައި ބައިވެރިވި ފަރާތްތަކާ ދެކޮޅަށް ގާނޫނީ ފިޔަވަޅު ނޭޅުމާއި، މުޒާހަރާތައް ކޮންޓްރޯލްކުރުމުގައި ފުލުހުން އަމަލުކުރި ގޮތާ މެދު އާންމުކޮށް މާފަށް އެދުން ހިމެނެ އެވެ.
މިނިސްޓަރު އިސްތިއުފާ ދެއްވުމަށް ފަހު، މުޒާހަރާ ސަރަހައްދުން ކަނޑާލާފައި އޮތް މޮބައިލް އިންޓަނެޓުގެ ހިދުމަތްތައް ވެސް ވަނީ އަލުން ދޭން ފަށާފަ އެވެ.
ކޮމެންޓު ފޮނުވާ