އިންޑިއާގެ ފުރަތަމަ އަމިއްލަ އޯބިޓަލް ރޮކެޓް ކާމިޔާބުކަމާ އެކު ޖައްވަށް

އިންޑިއާގެ އަމިއްލަ ކުންފުންޏަކުން ފުރަތަމަ ފަހަރަށް އުފެއްދި އޯބިޓަލް ރޮކެޓް "ވިކްރަމް-1″ މިއަދު ކާމިޔާބުކަމާ އެކު ޖައްވަށް ފޮނުވާލައިފި އެވެ. މިއާ އެކު އިންޑިއާ ވެފައި ވަނީ އެމެރިކާ އާއި ޗައިނާއަށް ފަހު އަމިއްލަ ކުންފުންޏަކުން ތައްޔާރުކުރި ޖައްވީ ރޮކެޓެއް ކާމިޔާބުކަމާ އެކު ފޮނުވި ތިންވަނަ ގައުމަށެވެ.

ސްކައިރޫޓް އެއިރޯސްޕޭސް އިން އުފެއްދި މި ރޮކެޓް އުދުއްސާލާފައި ވަނީ ސްރީހަރިކޯޓާގައި ހުންނަ ސަތީޝް ދަވަން ސްޕޭސް ސެންޓަރުންނެވެ. ކުދި ސެޓެލައިޓްތައް ތިރި އޯބިޓްތަކަށް ފޮނުވުމަށް ފަރުމާކޮށްފައިވާ ވިކްރަމް-1 ރޮކެޓަކީ ގާތްގަނޑަކަށް ހަތް ބުރީގެ އިމާރާތެއްގެ އުސްމިން ހުރި، 350 ކިލޯގްރާމާ ހަމައަށް ބަރު ތަކެތި އުފުލޭ ރޮކެޓެކެވެ.

"ހެލޯ ސްޕޭސް، އަހަރެމެން މި އައީ!" ސްކައިރޫޓުން ރޮކެޓް ފޮނުވާލި ގޮތާ އެކު އެކްސްގައި ޕޯސްޓްކުރި އެވެ. އަދި ޓެސްޓް ފްލައިޓް-1 ފުރިހަމަކޮށް، ގައުމުގެ ޕްރައިވެޓް ސެކްޓާގެ ފުރަތަމަ ލޯންޗު ކާމިޔާބުކުރި ކަން އެ ކުންފުނިން ވަނީ އިއުލާނުކޮށްފަ އެވެ.

ބޮޑުވަޒީރު ނަރެންދުރަ މޯދީ ސިފަކުރެއްވި ގޮތުގައި މިއީ "އިންޑިއާގެ ޖައްވީ ދަތުރުތަކުގައި ތާރީހީ ކާމިޔާބީ" އެކެވެ. "އަހަރެމެންގެ ޕްރައިވެޓް ސެކްޓާގެ ބައިވެރިވުން އިތުރުވުމަކީ އާ އުދަރެސްތަކެއް ހުޅުވި، އާ އީޖާދުތަކަށް މަގުފަހިވާ ކަމެއް. މި ކާމިޔާބީގެ ސަބަބުން އެތައް ހާސް ޒުވާނުންނަކަށް މިއަށްވުރެ ބޮޑެތި ހުވަފެންތައް ހަގީގަތަކަށް ހެދުމަށް އުފެއްދުންތެރިކަމުގެ ހިތްވަރު ލިބޭނެ،" މޯދީ ވިދާޅުވި އެވެ.

ސަރުކާރުގެ އިންޑިއަން ނޭޝަނަލް ސްޕޭސް ޕްރޮމޯޝަން އެންޑް އޮތޮރައިޒޭޝަން ސެންޓަރުގެ ޗެއާމަން ޕަވަން ގޮއެންކާ ވިދާޅުވީ، އަމިއްލަ ކުންފުންޏަކުން ކުރި ފުރަތަމަ އޯބިޓަލް ލޯންޗެއްގެ ގޮތުގައި މި ދަތުރު ނިންމާލި ގޮތް "އުންމީދު ކުރި ވަރަށް ވުރެ މާ މަތީ" ކަމަށެވެ.

މި ރޮކެޓްގައި ފާހަގަކޮށްލެވޭ ތަކެތި ވެސް ފޮނުވި އެވެ. އޭގެ ތެރޭގައި ލެބުގައި އުފެއްދި އަލިމަހަކާއި ޖައްވީ ކުނިބުނި ނައްތާލުމުގެ ގާބިލުކަން ލިބިފައިވާ ރޮބޮޓިކް އަތްތަކެއް ހިމެނެ އެވެ. މީގެ އިތުރުން، އިންޑިއާގެ ފިޒިސިސްޓުން ކަމަށްވާ ވިކްރަމް ސާރާބާއީ އާއި ސީ.ވީ. ރާމަން، އަދި ކުރީގެ ރައީސް އަދި މަޝްހޫރު އެއިރޯސްޕޭސް އިންޖިނިއަރު އޭ.ޕީ.ޖޭ. އަބްދުލްކަލާމްގެ ކުދި ބުދުތައް ހިމެނޭ، 18 ކެރެޓްގެ ރަނުން ހަދާފައިވާ ކުޑަކުޑަ ރޮކެޓެއް ވެސް ފޮނުވި އެވެ.

އިންޑިއަން ސްޕޭސް ރިސާޗް އޯގަނައިޒޭޝަން (އިސްރޯ) އިން ދިގު މުއްދަތަކަށް ކޮށްފައިވާ އިންވެސްޓްމަންޓްތަކުގެ މައްޗަށް ބިނާވެފައިވާ އިންޑިއާގެ ޖައްވީ ސިނާއަތް ފަހަކަށް އައިސް ދަނީ ވަރަށް ބޮޑަށް ފުޅާވަމުންނެވެ. 2020 ވަނަ އަހަރު އަމިއްލަ ފަރާތްތަކަށް މި ދާއިރާ ހުޅުވާލި ފަހުން، މިހާރު 8.4 ބިލިއަން ޑޮލަރުގެ އަގުހުރި އެ ގައުމުގެ ޖައްވީ އިގްތިސާދުގައި 400 އަށްވުރެ ގިނަ ސްޓާޓްއަޕް ހަރަކާތްތެރިވެ އެވެ.

ފޮރިން މިނިސްޓަރު އެސް. ޖަޔަޝަންކަރު ވިދާޅުވި ގޮތުގައި މި ކާމިޔާބީއާ އެކު "އިންޑިއާގެ ޖައްވީ އުންމީދުތައް އާ އުސްމިންތަކަކަށް" ވަނީ އުފުލިފަ އެވެ. ފާހަގަކޮށްލެވޭ ގޮތުގައި 2023 ވަނަ އަހަރުގެ އޯގަސްޓް މަހު، ރަޝިޔާ އާއި އެމެރިކާ އަދި ޗައިނާއަށް ފަހު، ހަނދަށް އިންސާނަކު ނުލައި ދިޔަ އުޅަނދެއް ކާމިޔާބުކަމާ އެކު ޖެއްސި ހަތަރުވަނަ ގައުމަކަށް ވެސް އިންޑިއާ ވިއެވެ.

އިސްރޯގެ ކުރީގެ ޗެއާމަން ކޭ. ސިވަން ވިދާޅުވީ ޖައްވީ ސްޓާޓްއަޕްތަކުން ކުރަމުން އަންނަ މަސައްކަތްތަކުގެ ސަބަބުން، އަމިއްލަ ފަރާތްތަކަށް މި ދާއިރާ ހުޅުވާލުމުން އިންދި އޮށުގެ "މޭވާ" މިއަދު ގައުމަށް ލިބެމުންދާ ކަމަށެވެ. "ރޮކެޓަކީ ޖައްވީ ނިޒާމުގައި އެންމެ ގޮންޖެހުން ބޮޑު އަދި އޮޅުންބޮޅުން ބޮޑު ޓެކްނޮލޮޖީތަކުގެ ތެރެއިން އެއްޗެއް. އިންޑިއާގެ ސްޓާޓްއަޕަކަށް މިކަން ކުރެވޭ ނަމަ، އެއީ ބައިނަލްއަގުވާމީ ގޮތުން އިންޑިއާގެ އަގު ވަރަށް ބޮޑަށް އުފުލިގެންދާނެ ކަމެއް،" އޭނާ ވިދާޅުވި އެވެ.