ޢިރާޤުގައި ޙަރަކާތްތެރިވަމުންދާ އެމެރިކާގެ ހުރިހާ ސިފައިން މި އަހަރުގެ ސެޕްޓެންބަރު މަހުގެ ނިޔަލަށް އެ ޤައުމުން ފައިބާނެކަން ދެ ޤައުމުގެ ސަރުކާރުން ރަސްމީކޮށް ހާމަކޮށްފިއެވެ.
މި ނިންމުން އިޢުލާނުކުރެއްވީ ވައިޓް ހައުސްގައި އެމެރިކާގެ ރައީސް ޑޮނަލްޑް ޓްރަމްޕާއި ޢިރާޤުގެ ބޮޑުވަޒީރު ޢަލީ އަލް ޒައިދީ ބައްދަލުކުރެއްވުމަށްފަހުއެވެ. އެ ބައްދަލުވުމުގައި ޓްރަމްޕް ވިދާޅުވީ، ޢިރާޤުގައި އެމެރިކާގެ ސިފައިން ދެމެހެއްޓުމުގެ ޙާޖަތެއް މިހާރު ނެތްކަމަށާއި، ދެ ޤައުމުގެ ދެމެދުގައި އޮތް ގުޅުން މިހާރު ބަދަލުވެފައިވަނީ ތެޔޮ ވިޔަފާރީގެ ދާއިރާ ހިމެނޭހެން، މައިގަނޑު ގޮތެއްގައި އިޤްތިޞާދީ ބައިވެރިވުމަކަށް ކަމަށެވެ. ބޭނުންޖެހިއްޖެ ޙާލަތެއްގައި ޢިރާޤަށް ސަލާމަތީ އެހީތެރިކަން ފޯރުކޮށްދޭނެ ކަމުގެ ޔަޤީންކަން ޓްރަމްޕް ދެއްވިއެވެ.
ބޮޑުވަޒީރު އަލްޒައިދީ ވިދާޅުވި ގޮތުގައި، ސެޕްޓެންބަރު 30 ގެ ނިޔަލަށް ޢިރާޤުގައި ތިބި އެމެރިކާގެ ހުރިހާ ސިފައިން ފައިބައި ނިމޭނެއެވެ. އެހެންނަމަވެސް އެމެރިކާގެ ވިޔަފާރި ކުންފުނިތަކުގެ ޙަރަކާތްތައް ކުރިއެކޭ އެއްފަދައިން ޢިރާޤުގައި ދެމިއޮންނާނެއެވެ.
އެމެރިކާގެ ދިފާޢީ ވުޒާރާއިން ބުނީ، ދާޢިޝް ނިރުބަވެރި ޖަމާޢަތާ ދެކޮޅަށް ޢިރާޤާއެކު 2024 ވަނަ އަހަރު ސޮއިކުރި އަސްކަރީ އެއްބަސްވުން ނިމުމަކަށް ގެންނަން ނިންމާފައިވާ ކަމަށެވެ. ދިފާޢީ ވަޒީރު ޕީޓް ހެގްސެތު ވިދާޅުވި ގޮތުގައި، ދެ ޤައުމުގެ ދެމެދުގައި މިހާރު ބިނާވަމުންދާ ގުޅުމަކީ ނިރުބަވެރިކަމުގެ ބިރުވެރިކަން ފިލައި، ސުލްޙަވެރި ސަރަޙައްދެއް ޤާއިމުކުރުމަށް އަމާޒުކޮށްފައިވާ ގުޅުމެކެވެ.
މި އެއްބަސްވުމަކީ ކުރީގެ ރައީސް ޖޯ ބައިޑެންގެ ވެރިކަމުގައި އެކުލަވާލި އެއްބަސްވުމެކެވެ. މި އެއްބަސްވުމުގެ ދަށުން ޢިރާޤުގައި ތިބި ސިފައިންގެ ތެރެއިން ގިނަ ބަޔަކު މިހާރު ވަނީ އެ ޤައުމުން ފައިބައިފައެވެ. ދާޢިޝްއާ ދެކޮޅަށް ކުރާ މަސައްކަތުގެ ފުރިހަމަ ޒިންމާ، އެމެރިކާއިން ތަމްރީނުކޮށްފައިވާ ޢިރާޤުގެ އަސްކަރިއްޔާއާ ޙަވާލުކުރުމަކީ މިހާރު ކުރިއަށްދާ މަރުޙަލާއެވެ.
ފާހަގަކޮށްލެވޭ ގޮތުގައި، އެމެރިކާ ސިފައިން ޢިރާޤަށް ފުރަތަމަ އެރީ 2003 ވަނަ އަހަރުގެ މާރިޗު މަހުއެވެ. އެ އޮޕަރޭޝަން ހިންގުމުގެ މައިގަނޑު ސަބަބެއްކަމުގައި އޭރު ދެއްކީ، ޢިރާޤުގެ ރައީސް ސައްދާމް ޙުސައިން ފަނާކުރަނިވި ހަތިޔާރު ގެންގުޅުއްވާކަމަށް ބުނާ މަޢުލޫމާތެވެ. ފަހުން، ކުރީގެ ރައީސް ޖޯޖް ޑަބްލިއު ބުޝް ވަނީ އެފަދަ ހަތިޔާރެއް ޢިރާޤުގައި ނެތްކަން ޤަބޫލުކުރައްވައި، އެކަން ހާމަކުރައްވައިފައެވެ. 2003 އިން ފެށިގެން 2011 އަށް ދިގުދެމިގެންދިޔަ ހަނގުރާމައިގައި ފަސް ލައްކައެއްހާ މީހުން މަރުވެފައިވާކަމަށް ދިރާސާތަކުން ދައްކައެވެ.
2007 ވަނަ އަހަރު ޢިރާޤުގައި ތިބި އެމެރިކާ ސިފައިންގެ ޢަދަދު 170،000 އަށް އެރި ނަމަވެސް، ކުރީގެ ރައީސް ބަރަކް އޮބާމާގެ ވެރިކަމުގައި 2011 ވަނަ އަހަރު ގިނަ ސިފައިން އަނބުރާ ގެންދިޔައެވެ. ނަމަވެސް 2014 ވަނަ އަހަރު ދާޢިޝްގެ ނުރައްކާ ބޮޑުވުމުން، ޢިރާޤު ސަރުކާރުގެ އެދުމުގެ މަތިން އެމެރިކާ ސިފައިން އެނބުރި ޢިރާޤަށް ދިޔައެވެ. ދާޢިޝްގެ ބާރު ކަނޑުވާލެވުމާ ގުޅިގެން، ދެ ޤައުމު ގުޅިގެން ހިންގަމުންދިޔަ އަސްކަރީ އޮޕަރޭޝަންތައް 2021 ވަނަ އަހަރު ރަސްމީކޮށް ނިންމާލިއެވެ. މިވަގުތު ޢިރާޤުގައި ތިބީ އެމެރިކާގެ އަސްކަރީ ލަފާދޭ މަޝްވަރާވެރިންނާއި، މަދު ޢަދަދެއްގެ ސިފައިން އެކުވެގެން އުފައްދާފައިވާ ކުޑަ ޓީމެކެވެ.
ކޮމެންޓު ފޮނުވާ