ބާންހަމް އިންތިޚާބަކާ ނުލައި އިނގިރޭސި ބޮޑުވަޒީރުކަމަށް އަޔަ ނުދިނުމަށް ރޭހަށް އިތުރު ބަޔަކު ނިކުންނަނީ!

އެންޑީ ބާންހަމް އިންތިޚާބަކާ ނުލައި އިނގިރޭސިވިލާތުގެ ބޮޑުވަޒީރުކަމަށް ވަޑައިގަތުމަށް ހުރަސްއެޅުމުގެ ގޮތުން، ލޭބަރ ޕާޓީގެ އިސް ދެ މެމްބަރަކު ލީޑަރުކަމަށް ވާދަކުރެއްވުމަށް ވިސްނަވަމުން އެބަގެންދަވައެވެ.

ބީބީސީއަށް މައުލޫމާތު ލިބިފައިވާ ގޮތުގައި، ކުރީގެ ޑިފެންސް މިނިސްޓަރު އަލް ކާންސް އާއި ސަރ ކިއަރ ސްޓާމަރގެ ޗީފް ސެކްރެޓަރީ ޑަރެން ޖޯންސް ގެންދަވަނީ މި ރޭހަށް ނުކުތުމާމެދު ގޮތެއް ނިންމަވަމުންނެވެ. ހޯމަ ދުވަހު ސްޓާމަރ އިސްތިއުފާ ދެއްވާނެކަން އިއުލާނުކުރެއްވުމާ ގުޅިގެން، ނަން ހުށަހެޅުމުގެ ސުންގަޑި ހަމަވާ ދުވަހުގެ އަނެއް ދުވަސް ކަމަށްވާ ޖުލައި 17 ވަނަ ދުވަހު ބާންހަމް ބޮޑުވަޒީރުކަމާ ހަވާލުވެވަޑައިގަންނަވާނެކަމަށް ގިނަ މެމްބަރުންތަކެއް ގަބޫލުކުރެއެވެ.

ނަމަވެސް، ވާދަވެރި އިންތިޚާބެއް ނުބާއްވައި، އަދި ކެންޑިޑޭޓެއްގެ ސިޔާސަތުތައް ވަޒަންކުރުމެއް ނެތި ލީޑަރަކު ހޮވުމަކީ ޕާޓީގެ ގިނަ މެމްބަރުން ކަންބޮޑުވާ ކަމެކެވެ. ސްޓާމަރގެ އަރިސް ބޭފުޅެއްކަމަށްވާ ޖޯންސް ވާދަކުރެއްވުމަށް ބައެއް މެމްބަރުން ބާރުއަޅަމުންދާއިރު، އޭނާ އަދި ވަކި ގޮތެއް ނިންމަވާފައެއް ނުވެއެވެ. އަދި ދާދިފަހުން ޑިފެންސް ބަޖެޓާ ގުޅޭ މައްސަލަތަކެއްގައި އިސްތިއުފާދެއްވި ކާންސް ވެސް ވަނީ މި މަގާމަށް ޝައުގުވެރިކަން ހުރިކަމުގެ އިޝާރާތެއް ދެއްވާފައެވެ.

ލޭބަރ ޕާޓީގެ އާ ލީޑަރަކު ހޮވުމަށް ނަން ހުށަހެޅުމުގެ ފުރުސަތު ޖުލައި 9 އިން 16 އަށް ވަނީ ހުޅުވާލާފައެވެ. ވާދަކުރައްވާ ކެންޑިޑޭޓުން މަދުވެގެން 81 މެމްބަރުންގެ ތާއީދު ހޯއްދަވަން ޖެހޭނެއެވެ. މޭކާފީލްޑް ބައި އިލެކްޝަން ކާމިޔާބުކުރެއްވި ގްރޭޓަރ މެންޗެސްޓަރގެ ކުރީގެ މޭޔަރު ބާންހަމްއަކީ މިހާރު މި ރޭހުގެ އެންމެ ކުރީގައި އުޅުއްވާ ބޭފުޅާއެވެ. އޭނާއާ އެންމެ ބޮޑަށް ވާދަކުރައްވާނެކަމަށް ބެލެވުނު ވެސް ސްޓްރީޓިން ވަނީ ބާންހަމްއަށް ތާއީދުކުރައްވާކަން އިއުލާނުކުރައްވައި، އިންތިޚާބަކާ ނުލައި އޭނާ ހޮވުމުގެ ފުރުސަތު ބޮޑުކޮށްދެއްވާފައެވެ.

އާންމުންގެ ކުރިމަތީގައި ކެންޑިޑޭޓުންގެ ސިޔާސަތުތައް ހާމަކޮށް ފުރިހަމަ އިންތިޚާބެއް ބޭއްވުން މުހިންމުކަމަށް ލޭބަރ ޕާޓީގެ ބައެއް މެމްބަރުން ބުނަމުންދާއިރު، އިދިކޮޅު ޕާޓީތަކުން ދަނީ ސަރުކާރަށް ވަރަށް ބޮޑަށް ފާޑުކިޔަމުންނެވެ. އެގޮތުން ކޮންޒަވޭޓިވް ޕާޓީގެ ލީޑަރު ކެމީ ބޭޑަނޮކް އާއި ލިބަރަލް ޑިމޮކްރެޓްސްގެ ލީޑަރު ސަރ އެޑް ޑޭވީ ވަނީ ލޭބަރ ޕާޓީގެ ސިޔާސަތުތަކަށާއި ބޮޑުވަޒީރުން ބަދަލުވަމުންދާ ދިއުމަށް ފާޑުވިދާޅުވެފައެވެ. އަދި ރިފޯމް ޕާޓީގެ ލީޑަރު ނައިޖެލް ފަރާޖް ވަނީ އަވަސް އާންމު އިންތިޚާބަކަށް ގޮވާލައްވާފައެވެ.