މީގެ 12 އަހަރު ކުރިން ފުލުހުންގެ ވަޒީފާއިން ވަކިކުރި އިންސްޕެކްޓަރ އޮފް ޕޮލިސް އަޙްމަދު ޝިޔާމަށް، ހައި ކޯޓުގެ ޙުކުމާ އެއްގޮތަށް އަލުން ވަޒީފާ ދީފިއެވެ.
ނޯތު ޕޮލިސް ޑިވިޝަންގެ ކޮމާންޑަރަކަށް ހުންނަވަނިކޮށް، މަޤާމުގެ ނުފޫޒު ނަހަމަ ގޮތުގައި ބޭނުންކުރިކަމުގެ ތުހުމަތުގައި މެއި 2014 ގައި އޭނާ ވަޒީފާއިން ވަކިކުރީ ގޯސްކޮށް ކަމަށް ކަނޑައަޅައި، ވަޒީފާ އާއި ގެއްލުނު މުސާރަ އަނބުރާ ދިނުމަށް ހައި ކޯޓުން ވަނީ ދާދި ފަހުން އަމުރުކޮށްފައެވެ. އެ ކޯޓުން ނިންމީ އޭނާ ވަޒީފާއިން ވަކިކުރީ އެކަށީގެންވާ ސަބަބެއް އޮވެގެންކަން ސާބިތުކޮށްދިނުމުގައި ދައުލަތް ނުކުޅެދިފައިވާ ކަމަށެވެ. ކުރިން ސިވިލް ކޯޓުން ޝިޔާމާ ދެކޮޅަށް ޙުކުމްކުރި ނަމަވެސް، ހައި ކޯޓުން ވަނީ އެ ޙުކުމް ބާޠިލުކޮށްފައެވެ.
ހައި ކޯޓުގެ އެންގުމާ އެއްގޮތަށް ފުލުހުންގެ އިދާރާއިން މިހާރު އޭނާއަށް ވަޒީފާ ހަމަޖައްސައިދީފައިވާއިރު، ވަޒީފާއަށް ނުކުންނަވަން ފައްޓަވައި ޝިޔާމް ވިދާޅުވީ މިއީ އޭނާއަށް ލިބުނު ވަރަށް ބޮޑު ޝަރަފެއް ކަމަށާއި ފުލުހުންގެ ޔުނީފޯމަކީ އޭނާގެ ޙަޔާތުގެ އެންމެ މުހިންމު ބައި ކަމަށެވެ.
ޝިޔާމަށް ވަޒީފާ އަލުން އިޢާދަކޮށްދިން ނަމަވެސް، ވަޒީފާއިން ވަކިކޮށްފައި ހުރި މުއްދަތުގެ މުސާރައާއި އިނާޔަތްތައް އަދި ދީފައެއް ނުވެއެވެ. ސުޕްރީމް ކޯޓުން ކުރިން ކަނޑައަޅާފައިވާ އުސޫލުތަކުގައިވާ ގޮތުން، ވަޒީފާ އަލުން ދޭ ހާލަތުގައި ގިނަވެގެން ނަގައިދެވޭނީ ހަ މަސް ދުވަހުގެ މުސާރަކަމަށް ވާތީ، ދައުލަތުން މިހާރު ވަނީ މުސާރަ ދޭން އަމުރުކުރި ބައި ސުޕްރީމް ކޯޓުގައި އިސްތިއުނާފުކޮށްފައެވެ.
ކޮމެންޓު ފޮނުވާ