އިއްޔެ ހިނގި ކަނޑުމަތީގެ ނުރައްކާތެރި އެކްސިޑެންޓަށްފަހު މަޑުނުކޮށް ދިޔަ ސަޕްލައި ދޯނީގެ ކެޕްޓަންގެ ލައިސަންސް ފުލުހުން މިއަދު ހިފަހައްޓައިފިއެވެ.
ފުލުހުން މައުލޫމާތު ދެއްވި ގޮތުގައި، މި ހާދިސާއާ ގުޅިގެން އެ ކެޕްޓަންގެ މައްޗަށް ޖިނާއީ އަދި މަދަނީ ތަހުގީގެއް މިހާރު ދަނީ ހިންގަމުންނެވެ. މި އެކްސިޑެންޓް ހިނގާފައިވަނީ ދެ މީހުންނާއެކު ދަތުރުކުރަމުންދިޔަ "ޓުއާ ގާޑް" ނަމަކަށް ކިޔާ ލޯންޗަކާއި ސަޕްލައި ދޯންޏެއް ޖެހިގެންނެވެ. ލޯންޗުގައި ޖެހުމަށްފަހު އެ ދޯނި މަޑުނުކޮށް ގޮސްފައިވާއިރު، އެ މައްސަލަ ފުލުހުން އަންނަނީ ވަކި މައްސަލައެއްގެ ގޮތުގައި ބަލަމުންނެވެ.
މި ހާދިސާގައި ލޯންޗުގައި ތިބި ދެ ފަޅުވެރިންނަށް ބޮޑެތި އަނިޔާތަކެއް ވެފައިވާއިރު، އެ މީހުންނަށް އައިޖީއެމްއެޗްގައި އަންނަނީ ފަރުވާދެމުންނެވެ. އަނިޔާވެފައިވަނީ އުމުރުން 38 އަހަރުގެ ދިވެހި ފިރިހެނަކަށާއި 30 އަހަރުގެ ބިދޭސީ ފިރިހެނަކަށެވެ.
މި އެކްސިޑެންޓުގެ ސަބަބުން ލޯންޗުގެ ކުރީކޮޅު އެއްކޮށް ފުނޑުފުނޑުވެ ބޮޑެތި ގެއްލުންތަކެއް ލިބިފައިވެއެވެ. ނަމަވެސް އެކްސިޑެންޓުވި ދޯންޏަށް އެއްވެސް ގެއްލުމެއް ލިބިފައިވާކަން އަދި އެނގިފައެއް ނުވެއެވެ. ފުލުހުން އަންނަނީ މި ހާދިސާއާ ގުޅިގެން އަޅަންޖެހޭ އިތުރު ފިޔަވަޅުތައް ތަހުގީގުގެ ތެރެއިން އަޅަމުންނެވެ.
ކޮމެންޓު ފޮނުވާ