ކައުންސިލަރުންގެ މުސާރަ ބޮޑުކުރަން މަޖިލީހަށް ހުށަހަޅައިފި

ލޯކަލް ކައުންސިލްތަކުގެ މެންބަރުންގެ މުސާރަ ބޮޑުކުރުމަށް ރައްޔިތުންގެ މަޖިލީހަށް ހުށަހަޅައިފިއެވެ.

މި ހުށަހެޅުން މަޖިލީހަށް ހުށަހެޅުއްވީ އެމްޑީޕީއަށް ނިސްބަތްވާ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމެވެ. މަޖިލީހުގެ ރައީސަށް އޭނާ ފޮނުއްވި ސިޓީގައި އެދިވަޑައިގެންފައިވަނީ ކަމާގުޅޭ ކޮމިޓީ މެދުވެރިކޮށް، ކައުންސިލްތަކުގެ ރައީސުންގެ މުސާރަ 45,000 ރުފިޔާއަށް އަދި ނައިބު ރައީސުންގެ މުސާރަ 35,000 ރުފިޔާއަށް ބޮޑުކޮށްދިނުމަށެވެ. މީގެ އިތުރުން އާންމު ކައުންސިލް މެންބަރުންގެ މުސާރަ 25,000 ރުފިޔާއަށް ކަނޑައެޅުމަށްވެސް ވަނީ އެދިވަޑައިގެންފައެވެ.

މުސާރަ ބޮޑުކުރަން ހުށަހެޅުއްވި މައިގަނޑު ސަބަބެއްގެ ގޮތުގައި މެންބަރު ފާހަގަކުރައްވާފައިވަނީ، ކައުންސިލް ރައީސުންގެ މުސާރަ އެ އިދާރާތަކުގެ ސެކްރެޓަރީ ޖެނެރަލުންނަށްވުރެ ކުޑަވުމާއި، ބައެއް އިދާރީ މުވައްޒަފުންނަށްވުރެ ކައުންސިލަރުންގެ މުސާރަ ކުޑަވުމެވެ. މިއީ ނިޒާމާ ބީރައްޓެހި އަދި އިންތިޚާބީ އޮފިޝަލުންގެ ބާރުވެރިކަމަށް އުނިކަން އަންނާނެ ކަމެއް ކަމަށް އެ ސިޓީގައި ފާހަގަކޮށްފައިވެއެވެ.

ކައުންސިލަރުންގެ މުސާރަ ބޮޑުކުރަން ހުށަހަޅާފައި މިވަނީ، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންގެ މުސާރައަށްވެސް ބޮޑެތި ކުރިއެރުންތަކެއް ގެނެސްފައިވާ ދަނޑިވަޅެއްގައެވެ. އެގޮތުން ސިޓީތަކުގެ އަންހެނުންގެ ކޮމިޓީގެ ރައީސުންނަށް 41,000 ރުފިޔާ އަދި ރަށްރަށުގެ ރައީސުންނަށް 21,000 ރުފިޔާ ދޭގޮތަށް ދާދިފަހުން ވަނީ ނިންމާފައެވެ.