ވަޒީފާއާ ބެހޭ ޓްރައިބިއުނަލްގައި ހުރި މައްސަލަތަކާ ގުޅިގެން ލިޔުމުން ޖަވާބުދެއްވަން އެންގުމުން އެކަން ނުކުރެއްވި މެންބަރުން ރައްޔިތުންގެ މަޖިލީހުގެ ޖުޑީޝަރީ ކޮމިޓީއަށް ހާޒިރުކުރަން މިއަދު ނިންމައިފި އެވެ.
މި މައްސަލައަކީ އިންޑަސްޓްރިއަލް ރިލޭޝަންސް ގާނޫނުގެ ދަށުން ޓްރައިބިއުނަލަށް މައްސަލަ ހުށަހެޅޭނެ އިންތިޒާމެއް ނެތްކަމަށް ބުނެ، ކެންދޫ ދާއިރާގެ މެންބަރު މައުރޫފް ޒާކިރު ހުށަހެޅުއްވި މައްސަލައަކާ ގުޅިގެން ފެށުނު ކަމެކެވެ. މިކަމާ ގުޅިގެން މިދިޔަ ފެބްރުއަރީ މަހުގެ 24 ވަނަ ދުވަހު ވެސް ޓްރައިބިއުނަލްގެ މެންބަރުން ވަނީ ކޮމިޓީއަށް ހާޒިރުކޮށްފަ އެވެ. އެ ދުވަހުގެ ބައްދަލުވުމުގައި ޓްރައިބިއުނަލްގެ ރައީސް އިސްހާގު ހުސައިން ވަނީ މައްސަލަތައް ލަސްވާ ސަބަބުތައް ވިދާޅުވެދެއްވާފަ އެވެ. އެހެންނަމަވެސް، ކޮމިޓީން އެންގީ ކޮންމެ މެންބަރަކު ވަކިން ލިޔުމުން ޖަވާބުދާރީވުމަށެވެ.
ޖުޑީޝަރީ ކޮމިޓީން މިއަދު ބޭއްވި ބައްދަލުވުމުގައި ކޮމިޓީގެ މުގައްރިރު އަދި ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ވިދާޅުވީ، ކޮމިޓީގެ އެންގުމާ އެއްގޮތަށް ލިޔުމުން ޖަވާބު ފޮނުއްވީ ހަމައެކަނި ޓްރައިބިއުނަލްގެ ރައީސް ކަމަށެވެ. އެހެން މެންބަރުން އިތުރު އެއްޗެއް ވިދާޅުވާން ބޭނުން ނުވާކަމަށް އަންގާފައިވާތީ، މެންބަރު މައުރޫފް ވަނީ އެ ބޭފުޅުން ކޮމިޓީއަށް ހާޒިރުކޮށްގެން މައްސަލަ އިތުރަށް ބެލުމަށް ހުށަހަޅުއްވާފަ އެވެ. ފޭދޫ އުތުރުދާއިރާގެ މެންބަރު އިސްމާއީލް ނިޒާރު ތާއީދުކުރެއްވި މި ހުށަހެޅުން ފާސްވީ ކޮމިޓީގައި ތިއްބެވި މެންބަރުންގެ އިއްތިފާގުންނެވެ.
މީގެ ކުރިން ބޭއްވި ކޮމިޓީ ބައްދަލުވުމުގައި ވެސް މެންބަރުންގެ ފަރާތުން ޖަވާބުދާރީވެވަޑައިގަތީ ޓްރައިބިއުނަލްގެ ރައީސް އެކަންޏެވެ. އޭނާ ފާހަގަކުރެއްވި ގޮތުގައި، ޓްރައިބިއުނަލްގެ މަސައްކަތްތަކަށް ހުރި އެންމެ ބޮޑު ގޮންޖެހުމަކީ ވަސީލަތްތައް މަދުވުމާއި މިހާރު އަމަލުކުރަމުންދާ ގާނޫނުތައް ހުރި ގޮތެވެ. ނަމަވެސް، މެންބަރުން ލިޔުމުން ޖަވާބުދެއްވަން އުޒުރުވެރިވުމަކީ މި މައްސަލަ އިތުރަށް ތަހުގީގުކުރަންޖެހޭ ކަމެއްކަމަށް މިއަދުގެ ކޮމިޓީ ބައްދަލުވުމުގައި ފާހަގަކޮށްފައިވެ އެވެ.
ކޮމެންޓު ފޮނުވާ