ސަރުކާރުގެ ފަރާތުން ރާއްޖޭގެ ސައިބަރ ވެށި ރައްކާތެރިކުރުމާ ގުޅޭ މުހިންމު ބިލެއް ރައްޔިތުންގެ މަޖިލީހުގެ މިއަދުގެ ޖަލްސާއަށް ތައާރަފުކޮށްފިއެވެ. ސަރުކާރުގެ ފަރާތުން މި ބިލް މަޖިލީހަށް ހުށަހެޅުއްވީ މެދުހެންވޭރު ދާއިރާގެ މެންބަރު ހުސައިން ނާސިހެވެ.
މި ބިލުގެ މައިގަނޑު ބޭނުމަކީ ހަރުދަނާ ގާނޫނީ އޮނިގަނޑެއްގެ ތެރެއިން ދައުލަތާއި އަމިއްލަ ފަރާތްތަކުގެ މުހިންމު އިންފޮމޭޝަން ސިސްޓަމްތަކާއި އުމްރާނީ ވަސީލަތްތައް ރައްކާތެރިކުރުމެވެ. ހަމައެހެންމެ، އެތެރޭގެ އަދި ސަރަޙައްދީ ސައިބަރ ތްރެޓްތައް ދެނެގަނެ، އެފަދަ ހާދިސާތައް ހުއްޓުވައި އަދި އެކަންކަމަށް އިޖާބަދެވޭނެ ފުރިހަމަ ނިޒާމެއް ގާއިމުކުރުން ވެސް މި ބިލުގެ މަގުސަދުތަކުގެ ތެރޭގައި ހިމެނެއެވެ. މިކަންކަން ރާވައި ހިންގުމަށްޓަކައި ޚާއްސަ "ސައިބަރ ސެކިއުރިޓީ އެޖެންސީ" އެއް އުފައްދައި، އެ އިދާރާގެ ބާރުތަކާއި މަސްއޫލިއްޔަތުތައް މި ބިލުގައި ވަނީ ކަނޑައަޅާފައެވެ.
މީގެ އިތުރުން، ރާއްޖޭގެ ކްރިޓިކަލް އިންފޮމޭޝަން އިންފްރާސްޓްރަކްޗާގެ ދާއިރާތައް ކަނޑައަޅައި، އެ ދާއިރާތަކުގެ ސަލާމަތީ މިންގަނޑުތައް ބައިނަލްއަގުވާމީ ސްޓޭންޑަޑްތަކާއި ބެސްޓް ޕްރެކްޓިސްތަކާ އެއްގޮތަށް ގައުމީ ފެންވަރެއްގައި ބައްޓަންކުރުމަށް މި ބިލުން މަގުފަހިކޮށްދޭނެއެވެ. މިއީ ރާއްޖޭގެ ޑިޖިޓަލް މާހައުލުގެ އަމާންކަން ކަށަވަރުކުރުމަށް ސަރުކާރުން އެޅުއްވި ވަރަށް މުހިންމު ފިޔަވަޅެކެވެ.
ކޮމެންޓު ފޮނުވާ