ފެނަކަ ކޯޕަރޭޝަން ލިމިޓެޑްގެ މެނޭޖިން ޑިރެކްޓަރު އަދި ބޯޑު މެންބަރު ކަމުގެ މަގާމުގައި ހުންނެވި މޭޖަރ (ރިޓަޔާޑް) މުޙައްމަދު ނަޖާހު އެ މަގާމުތަކުން ވަކިކޮށްފިއެވެ.
ސަރުކާރުގެ ކުންފުނިތަކުގެ ބޯޑުތަކަށް ބަދަލު ގެނައުމުގެ އުސޫލުގެ ދަށުން ނަޖާހު މަގާމުން ވަކިކޮށްފައިވާއިރު، އޭނާ އެ މަގާމުން ވަކިކުރި ވަކި ސަބަބެއް ކަމާބެހޭ ފަރާތްތަކުން މިހާތަނަށް ރަސްމީކޮށް ހާމަކޮށްފައެއް ނުވެއެވެ. ނަޖާހު ފެނަކައިގެ އެމްޑީގެ މަގާމަށް އައްޔަންކުރެއްވީ މި ސަރުކާރު ވެރިކަމާ ހަވާލުވުމަށްފަހުގައެވެ. އޭނާ މަގާމުން ވަކިކުރުމާ ގުޅިގެން، ކުންފުނީގެ ހިންގުން ވަގުތީގޮތުން ވަނީ އެހެން ބޭފުޅަކާ ހަވާލުކޮށްފައެވެ.
ފެނަކައަކީ ރާއްޖޭގެ ގިނަ ރަށްތަކެއްގައި ކަރަންޓާއި ފެނާއި ނަރުދަމާގެ ހިދުމަތް ފޯރުކޮށްދެމުން އަންނަ ސަރުކާރުގެ މައި އެއް ކުންފުންޏެވެ. ކުންފުނީގެ އެންމެ އިސްވެރިޔާގެ މަގާމަށް ގެނެވުނު މި ކުއްލި ބަދަލާއެކު، ދެން އެ މަގާމަށް އައްޔަންކުރާނެ ބޭފުޅަކާ ގުޅޭގޮތުން ސަރުކާރުން އަދި ވަކި ގޮތެއް ނިންމާފައެއް ނުވެއެވެ. ކުންފުނީގެ ހިންގުން ހަރުދަނާކުރުމަށް ސަރުކާރުން ގިނަ ފިޔަވަޅުތަކެއް އަޅަމުންދާ މި ދަނޑިވަޅުގައި، މިއީ ކުންފުނީގެ މެނޭޖްމަންޓަށް ގެނެވުނު މުހިންމު ބަދަލެކެވެ.
ކޮމެންޓު ފޮނުވާ