އިރާގުގެ ބަޣްދާދުގައި ހުންނަ, ބޭރުގެ އެމްބަސީތައް ހުންނަ ބޮޑު ހޮޓަލަކަށް ޑްރޯން ހަމަލާއެއް ދީފި

އިރާގުގެ ވެރިރަށް ބަޣްދާދުގައި ހުންނަ ބޮޑު ހޮޓަލަކަށް އަމާޒުކޮށް ޑްރޯން ހަމަލާއެއް ދީފައިވާކަމަށް އެ ގައުމުގެ ކަމާބެހޭ ފަރާތްތަކުން ހާމަކޮށްފިއެވެ.

ސަރުކާރުގެ މުހިންމު އިމާރާތްތަކާއި އެމެރިކާގެ އެމްބަސީ ހުންނަ ގްރީން ޒޯންގައި ހުންނަ އަލްރަޝީދު ހޮޓަލުގެ މަތީ ފެންސުގައި ޑްރޯނެއް ޖެހިފައިވާއިރު، މި ހާދިސާގައި އެއްވެސް މީހަކަށް އަދި ތަނަކަށް ވެސް ގެއްލުމެއް ލިބުނުކަން މިހާތަނަށް އެނގިފައެއް ނުވެއެވެ. ފުރަތަމަ މިއީ އަލިފާނުގެ ހާދިސާއެއް ކަމަށް ބެލެވުނު ނަމަވެސް، ތަހުގީގަށްފަހު މިއީ ޑްރޯން ހަމަލާއެއްކަން ކަމާބެހޭ ވުޒާރާއިން ވަނީ ކަށަވަރުކޮށްދީފައެވެ.

މި ހަމަލާގެ އިތުރުން މީގެ ކުރިން ބަޣްދާދުގައި ހުންނަ އެމެރިކާގެ އެމްބަސީއަށް ކަޓިއުޝާ މަރުކާގެ ދެ ރޮކެޓް ހަމަލާއެއް ދީފައިވާކަމަށް ސަލާމަތީ ފަރާތްތަކުން ބުނެއެވެ. އެމްބަސީއަށާއި، ދެކުނުގެ ބޮޑު ތެޔޮ ދަނޑަކަށް އަދި މި ހޮޓަލަށް އަމާޒުކޮށް ދެމުންދާ ސިލްސިލާ ހަމަލާތަކަކީ އިރާގުގެ ސަލާމަތާއި ހަމަޖެހުމަށް އޮތް ބޮޑު ނުރައްކަލެއް ކަމަށާއި، އެއީ ނިރުބަވެރި އަމަލުތަކެއްގެ ގޮތުގައި އެ ގައުމުން ވަނީ ސިފަކޮށްފައެވެ. އަދި ޑިޕްލޮމެޓިކް މަންދޫބުންނަށް އަމާޒުކޮށް ދެވޭ ކޮންމެ ހަމަލާއެއް އިރާގު ސަރުކާރުން ވަނީ ހަރުކަށި އިބާރާތުން ކުށްވެރިކޮށްފައެވެ.

މިފަދަ ހަމަލާތަކާ ގުޅިގެން، އިރާގުގެ ބޮޑުވަޒީރު މުހައްމަދު ޝިޔާ އަލް ސުދާނީ ވަނީ މި އަމަލުތައް ހިންގާ ފަރާތްތައް ހޯދައި ހައްޔަރުކޮށް ހައްގުވާ އަދަބު ދިނުމަށް ސަލާމަތީ ބާރުތަކަށް އަމުރުކުރައްވާފައެވެ. ކަމާބެހޭ ވުޒާރާއިން ނެރުނު ބަޔާނެއްގައި ބުނެފައިވަނީ، މިފަދަ ޖިނާއީ އަމަލުތަކުގެ ސަބަބުން ގައުމަށް ބޮޑެތި ގެއްލުންތަކެއް ލިބޭކަމަށާއި، މިއީ ގައުމު އާރާސްތުކޮށް ތަނަވަސްކަން ގެނައުމަށް ސަރުކާރުން ކުރަމުންދާ މަސައްކަތްތަކަށް އެޅޭ ވަރަށް ބޮޑު ހުރަހެއް ކަމަށެވެ.