މާދަމާއިން ފެށިގެން މި މަހުގެ 23 ވަނަ ދުވަހުގެ ނިޔަލަށް ސަރުކާރުގެ އޮފީސްތައް ބަންދުވާނެކަން ކަލަންޑަރުން ދައްކައިފިއެވެ. މިއީ ރަމަޟާން މަހުގެ ފަހު ދިހައަކާއި ފިތުރު އީދުގެ ބަންދާ ގުޅިގެން އައި ދިގު ޗުއްޓީއެކެވެ.
ރަމަޟާން މަހުގެ ފަހު ދިހައިގެ ދުވަސްތަކަކީ ސަރުކާރު ބަންދު ދުވަސްތަކެއްގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކަނޑައަޅުއްވާފައެވެ. އެގޮތުން 1445 ވަނަ އަހަރުން ފެށިގެން، ކޮންމެ ރަމަޟާން މަހެއްގެ 20 ވަނަ ދުވަހުން ފެށިގެން އެ މަހުގެ ނިޔަލަށް ސަރުކާރު އޮފީސްތައް ބަންދުވާނެއެވެ. މާދަމާއަކީ މި އަހަރުގެ ރޯދަ މަހުގެ ފަހު ދިހަ ގުނަން ފަށާ ދުވަހެވެ.
ކަލަންޑަރުގައި ވާގޮތުން މި އަހަރުގެ ފިތުރު އީދު ދުވަހަކީ މި މަހުގެ 20 ވަނަ ދުވަހެވެ. އީދާ ގުޅިގެން 21 އަދި 22 ވަނަ ދުވަހުވެސް ސަރުކާރު ބަންދުވާނެއެވެ. އެހެންކަމުން ފަހު ދިހައިގެ ބަންދާއި އީދު ބަންދު އެއްކޮށްލުމުން ޖެހިޖެހިގެން 14 ދުވަހު ސަރުކާރު ބަންދުވާނެއެވެ. މި ދިގު ޗުއްޓީއަށްފަހު ސަރުކާރުގެ އޮފީސްތައް ދެން ހުޅުވޭނީ މި މަހުގެ 23 ވާ ހޯމަ ދުވަހުއެވެ.
މި ދުވަސްތަކުގައި ސަރުކާރު އޮފީސްތައް ބަންދުވި ނަމަވެސް، ރައްޔިތުންނަށް ކޮންމެހެން ފޯރުކޮށްދޭންޖެހޭ އަސާސީ ޚިދުމަތްތައް މެދުކެނޑުމެއްނެތި ކުރިއަށްދާނެ ކަމަށް ސަރުކާރުން ވަނީ ހާމަކޮށްފައެވެ. އެގޮތުން އެކިއެކި މުއައްސަސާތަކުން ރައްޔިތުންނަށް ދޭންޖެހޭ ޚިދުމަތްތައް ދޭނެ ގޮތުގެ އިންތިޒާމުތައް އެތަންތަނުން ކަނޑައަޅާނެއެވެ.
ކޮމެންޓު ފޮނުވާ