ރަމަޟާން މަސް ނިމެން ކުޑަތަންވެފައި ވަނިކޮށް، ގިނަ ދުވަސްތަކެއްގެ މެދުކެނޑުމަކަށްފަހު ރައްޔިތުންގެ މަޖިލީހުގެ މި ރަމަޟާން މަހުގެ ފުރަތަމަ ޖަލްސާ މިއަދު ބާއްވައިފިއެވެ.
ސަރުކާރު ހިންގާ ޕީއެންސީގެ ބޮޑު އަޣުލަބިއްޔަތެއް އޮންނަ 20 ވަނަ ރައްޔިތުންގެ މަޖިލީހުގެ ޖަލްސާއެއް އެންމެ ފަހުން ބާއްވާފައިވަނީ މިދިޔަ ޝަޢުބާން މަހުގެ ފަހު ދުވަސް ކަމަށްވާ ފެބްރުވަރީ މަހުގެ 17 ވަނަ ދުވަހުއެވެ. އެހެންކަމުން މިއަދުގެ ޖަލްސާ މި ބޭއްވީ 18 ދުވަހުގެ ހުސްކަމަކަށް ފަހުގައެވެ. މި މުއްދަތުގެ ތެރޭގައި ތަޅުމުގެ ޖަލްސާތައް ނުބޭއްވި ކަމުގައިވިޔަސް، އިޖުތިމާއީ ކޮމިޓީއާއި، ޖުޑީޝަރީ ކޮމިޓީއާއި، މާލިއްޔަތު ކޮމިޓީގެ ސަބް ކޮމިޓީގެ އިތުރުން ގައުމީ ތަރައްގީއާއި ތަރިކައިގެ ކޮމިޓީގެ ބައްދަލުވުންތައް ވަނީ ކުރިއަށް ގެންގޮސްފައެވެ. އަދި މިއަދުވެސް ހަތަރު ކޮމިޓީއެއްގެ ބައްދަލުވުން ވަނީ ތާވަލުކޮށްފައެވެ.
މިއަދު ކުރިއަށްދާ ޖަލްސާގެ އެޖެންޑާގައި މުހިންމު ކަންތައްތަކެއް ހިމަނާފައިވެއެވެ. އޭގެ ތެރޭގައި ސަރުކާރުން ހުށަހަޅާފައިވާ ވަޠަނީ ޚިދުމަތުގެ ބިލާއި، ސާބިއާ، އޮމާން އަދި އަރުމީނިއާއަށް ކަނޑައަޅާ ސަފީރުންނާ މެދު ޚާރިޖީ ކޮމިޓީން ނިންމިގޮތުގެ ރިޕޯޓުތަކަށް ބަހުސްކުރުން ހިމެނެއެވެ. މީގެ އިތުރުން ވަޒީފާއާ ބެހޭ ގާނޫނަށް އިސްލާހު ގެނައުމުގެ ބިލާ ގުޅޭގޮތުން ގައުމީ ތަރައްގީއާއި ތަރިކައިގެ ކޮމިޓީން ނިންމިގޮތުގެ ރިޕޯޓަށްވެސް މިއަދު ބަހުސްކުރާނެއެވެ.
މަޖިލީހުގެ މެންބަރަކު މަޢުލޫމާތު ދެއްވާފައިވާ ގޮތުގައި، ރަމަޟާން މަހުގެ ފަހު ދިހައަކާ ގުޅިގެން މާދަމާއިން ފެށިގެން ސަރުކާރު ބަންދުވާއިރު، އެ ދުވަސްތަކުގައި މަޖިލީހުގެ ޖަލްސާތައް ނޯންނާނެކަން ވަނީ އަންގާފައެވެ. އަދި ދެން ޖަލްސާއެއް އޮންނާނީ ހަ ރޯދައަށް ފަހުގައެވެ.
ޖަލްސާތައް މެދުކެނޑިފައިވާ މި ދަނޑިވަޅަކީ ކުރިއަށް އޮތް ލޯކަލް ކައުންސިލް އިންތިޚާބުގެ ކެމްޕެއިންގައި ވެރިކަންކުރާ ޕާޓީއާއި އިދިކޮޅު އެމްޑީޕީގެ މެންބަރުންވެސް ވަރަށް ބޮޑަށް ހަރަކާތްތެރިވަމުންދާ ދުވަސްވަރެއްކަން ފާހަގަކޮށްލެވެއެވެ. ދައުލަތުން ބޮޑު މުސާރައަކާއި ގިނަ އިނާޔަތްތަކެއް ދީފައިވާ މެންބަރުންގެ ޖަލްސާތައް ނުބޭއްވި ގިނަ ދުވަސްތަކެއް ވުމަކީ އާންމުންގެ ސަމާލުކަން ލިބެމުންދާ ކަމެކެވެ.
ކޮމެންޓު ފޮނުވާ