ދިގު މެދުކެނޑުމަކަށް ފަހު، ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ޖަލްސާތައް މިއަދު ހެނދުނު 10:30 ގައި އަލުން ފެށުމަށް ވަނީ ތާވަލުކޮށްފައެވެ.
މަޖިލީހުގެ ޖަލްސާއެއް އެންމެ ފަހުން ބާއްވާފައިވަނީ މިދިޔަ ފެބްރުއަރީ މަހުގެ 17 ވަނަ ދުވަހުއެވެ. އެ ދުވަހުގެ ޖަލްސާ ނިންމާލީ ދެން ޖަލްސާއެއް ބާއްވާނެ ތާރީޚެއް އިއުލާނު ނުކޮށެވެ. އަދި މިހާ ގިނަ ދުވަސްތަކެއް ވަންދެން ޖަލްސާތައް މެދުކެނޑިފައި އޮތް ސަބަބެއް މަޖިލީހުގެ އިދާރާއިން ހާމަކޮށްފައެއް ނުވެއެވެ. އާންމު އުސޫލެއްގެ ގޮތުން މަޖިލީހުގެ ޖަލްސާތައް ކޮންމެ ހަފްތާއެއްގެ ހޯމަ، އަންގާރަ އަދި ބުދަ ދުވަހު ބާއްވައެވެ.
މިއަދުގެ ޖަލްސާގެ އެޖެންޑާގައި ހިމެނޭ އެންމެ މުހިންމު އެއް މަސައްކަތަކީ، ބޭރު ގައުމުތަކަށް ކަނޑައަޅުއްވާ ނޮން-ރެސިޑެންޓް ސަފީރުން އައްޔަނުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވާފައިވާ ނަންފުޅުތައް ދިރާސާކުރުމަށް ކަމާގުޅޭ ކޮމިޓީއަށް ފޮނުވުމެވެ. މީގެ އިތުރުން، މަޖިލީހުގައި ކުރިން ފަށައި ނުނިމި އޮތް ވަތަނީ ޚިދުމަތުގެ ބިލުގެ ބަހުސް ކުރިއަށް ގެންދިއުމަށްވެސް ވަނީ ހަމަޖެހިފައެވެ.
މަޖިލީހުގެ ގަވާއިދު ބަޔާންކުރާ ގޮތުން، ގާނޫނުއަސާސީއާއި ގަވާއިދާ އެއްގޮތްވާ ގޮތުގެމަތިން މަޖިލީހުގެ އިދާރާއާއި، ޖަލްސާތަކާއި، ކޮމިޓީތައް ވަކި ފަރާތަކަށް ނުޖެހި ހިންގުމުގެ އެންމެ އިސްވެރިޔަކީ މަޖިލީހުގެ ރައީސެވެ. އަދި ކޮންމެ ޖަލްސާއެއްގައި ހިނގާދިޔަ ކަންކަން ޔައުމިއްޔާގައި ސާފުކޮށް އެނގެން އޮންނަން ޖެހޭނެކަމަށްވެސް އެ ގަވާއިދުގައި ކަނޑައަޅާފައިވެއެވެ.
ކޮމެންޓު ފޮނުވާ