އަންހެނުންގެ ކުރިއެރުމަށާއި ބާރުވެރިކުރުވުމަށް ރާއްޖޭގެ ތާރީޚުގައިވެސް އެންމެ ބޮޑު އިސްކަމެއް ދެނީ މި ސަރުކާރުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ބައިނަލްއަޤްވާމީ އަންހެނުންގެ ދުވަހުގެ ތަހުނިޔާ ފޮނުއްވަމުން، ޕީއެންސީން ރޭ ބޭއްވި "ދަ ގްރޭޓަރ އައްޑޫ ވިޝަން" ލޯންޗުކުރުމުގެ ޖަލްސާގައި ވާހަކަފުޅުދައްކަވަމުން ރައީސް ވަނީ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް މި ސަރުކާރުން ގެނެސްދެއްވި ހެޔޮ ބަދަލުތަކަށް އަލިއަޅުއްވާލައްވާފައެވެ. އެގޮތުން، އެ ކޮމިޓީތައް ހިންގުން ހަރުދަނާކުރުމަށް ޤާނޫނީ އަދި އިދާރީ ގޮތުން ގިނަ ފިޔަވަޅުތަކެއް އަޅައި، މީގެ ކުރިން ނުލިބޭ އެތައް ޙައްޤުތަކެއް ކަށަވަރުކޮށްދެއްވާފައިވާކަން އެމަނިކުފާނު ފާހަގަކުރެއްވިއެވެ.
އަންހެނުންގެ ކޮމިޓީތަކުގެ މާލީ ތަނަވަސްކަން އިތުރުކުރުމަށްޓަކައި، ކައުންސިލް ބަޖެޓުން އެ ކޮމިޓީތަކަށް ކުރިން ލިބެމުންދިޔަ 5 އިންސައްތަ ވަނީ 10 އިންސައްތައަށް އިތުރުކޮށްދީފައެވެ. އަދި ކޮމިޓީ މެންބަރުންނަށް ރޯދަ އިނާޔަތް ލިބޭނެ މަގު ތަނަވަސްކޮށްދެއްވައި، އެ ފައިސާ ކޮމިޓީ ބަޖެޓުގެ ބަދަލުގައި ކައުންސިލްގެ ބަޖެޓުން ހަމަޖައްސަވައިދެއްވުމަކީ އަންހެނުންގެ މަސައްކަތުގެ އަގުވަޒަންކުރުމުގެ ގޮތުން އެޅުއްވި މުހިންމު ފިޔަވަޅެއްކަން ރައީސް ފާހަގަކުރެއްވިއެވެ.
އަންހެނުން އިޤްތިޞާދީ ގޮތުން ބާރުވެރިކުރުވުމަށް ޚާއްޞަ ލޯނުތައް ތަޢާރަފުކުރުމާއި، އަމިއްލަ މަސައްކަތުން އާމްދަނީ ހޯދޭނެ މަގުތައް ފަހިކޮށްދިނުމަކީ ސަރުކާރުގެ މުހިންމު ސިޔާސަތެކެވެ. މީގެ އިތުރުން، އަންހެނުންގެ ކޮމިޓީތަކުގެ ރައީސާއަކީ ފުލްޓައިމް އެގްޒެކެޓިވް މަޤާމަކަށް ބަދަލުކުރުމާއެކު، މާލީ އެހީތެރިކަން އިތުރުކޮށްދީ، މުޖުތަމަޢުގެ ހުރިހާ ދާއިރާއެއްގައިވެސް އަންހެނުންނަކީ ފައިހަމަކުރާ ބާރުވެރި ބަޔަކަށް ހެދުމަކީ މި ސަރުކާރުގެ އެންމެ ބޮޑު އެއް އަމާޒުކަމުގައި ރައީސް ވަނީ ވިދާޅުވެފައެވެ. އަދި އެކަނބަލުންނަށް ފަހި މުސްތަޤުބަލެއް ހޯދައިދިނުމުގައި ސަރުކާރު ދެމިއޮންނާނެކަމުގެ ޔަޤީންކަން އެމަނިކުފާނު ވަނީ ދެއްވާފައެވެ.
ކޮމެންޓު ފޮނުވާ