އައްޑޫ ސިޓީއަށް ދިމާވެފައިވާ ކަރަންޓު ކެނޑުމުގެ ބޮޑު މައްސަލައަށް، އަންނަ އަހަރުގެ ޖުލައި މަހުގެ ނިޔަލަށް ދާއިމީ ހައްލެއް ލިބިގެންދާނެކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.
ވެރިކަންކުރާ ޕީއެންސީން އައްޑުއަށް އެކުލަވާލި "ދަ ގްރޭޓާ އައްޑޫ" މެނިފެސްޓޯ އިފުތިތާހުކުރުމަށް އާޓިފިޝަލް ބީޗުގައި ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، އައްޑޫގެ ކަރަންޓަށް ދާއިމީ ހައްލެއް ގެނައުމުގެ އެއްބަސްވުމުގައި ސަރުކާރުން މިހާރު ސޮއިކޮށްފައިވާ ކަމަށެވެ. މި އެއްބަސްވުމުގެ ދަށުން 26 މެގަވޮޓްގެ ކަރަންޓު ފޯރުކޮށްދޭނެ ނިޒާމެއް ގާއިމުކުރެވި، ކުރިއަށް އޮތް 20 އަހަރަށް އައްޑޫގެ ކަރަންޓުގެ މައްސަލައަށް މުޅިން ނިމުމެއް އަންނާނެކަން އެމަނިކުފާނު ފާހަގަކުރެއްވިއެވެ.
އެތައް އަހަރެއްވީ މި މައްސަލަ ހައްލުކުރުމަށް ނިމިދިޔަ ސަރުކާރުންނާއި މިހާރުގެ އައްޑޫ ސިޓީ ކައުންސިލުން ވެސް އަމަލީގޮތުން އެކަށީގެންވާ މަސައްކަތްތަކެއް ކޮށްފައިނުވާކަމަށް ވިދާޅުވެ، ރައީސް ވަނީ ފާޑުވިދާޅުވެފައެވެ. އަދި ތަރައްގީގެ މަޝްރޫއުތައް ހުއްޓުމެއްނެތި އަދި ބާރުމިނުގައި ކުރިއަށް ގެންދިއުމަށްޓަކައި ކުރިއަށް އޮތް ކައުންސިލް އިންތިޚާބުގައި ސަރުކާރަށް ތާއީދުކުރާ ކެންޑިޑޭޓުންނަށް ވޯޓު ދެއްވުމަށް އެމަނިކުފާނު އައްޑޫ ރައްޔިތުންގެ ކިބައިން އެދިވަޑައިގަތެވެ. އިދިކޮޅު ކެންޑިޑޭޓުންނަށް ކައުންސިލްގެ މެޖޯރިޓީ ލިބިއްޖެނަމަ މަޝްރޫއުތައް ފަހަތަށް ޖެހިދާނެކަމުގެ ކަންބޮޑުވުން އެމަނިކުފާނު ފާޅުކުރެއްވިއެވެ.
އައްޑޫގެ ކަރަންޓު މައްސަލަ ހައްލުކުރުމަށްޓަކައި ވަގުތީ ފިޔަވަޅެއްގެ ގޮތުން ސަރުކާރުން ވަނީ މިދިޔަ މާރިޗު މަހުގެ ތެރޭގައި ވެސް އިތުރު ދެ ޖަނަރޭޓަރެއް އެ ސިޓީއަށް ފޮނުވައި، އޮޕަރޭޝަނަށް ގެނެސްފައެވެ. ގިނަ ބަޔަކު ގަބޫލުކުރާ ގޮތުގައި މި މައްސަލައަށް އެންމެ ފުރިހަމަ ހައްލެއް ލިބޭނީ ޗައިނާ ކުންފުންޏަކާ ހަވާލުކޮށްގެން އެ ސިޓީގައި އަލަށް އިމާރާތްކުރާ އިންޖީނުގޭގެ މަސައްކަތް ނިމުމުންނެވެ. ނަމަވެސް އެ މަޝްރޫއުގެ އަމަލީ މަސައްކަތް އަދި ފެށިފައެއް ނުވެއެވެ.
ކޮމެންޓު ފޮނުވާ