ރާއްޖޭގެ ތަރައްޤީއަށް ރައީސުލްޖުމްހޫރިއްޔާ ވެވަޑައިގެންފައިވާ ވަޢުދުތައް ފުއްދުމަށްޓަކައި، ކުރިއަށް އޮތް ލޯކަލް ކައުންސިލް އިންތިހާބު ކާމިޔާބުކުރުން ސަރުކާރަށް ވަރަށް މުހިންމުކަމަށް ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙް ވިދާޅުވެއްޖެއެވެ.
އާޓިފިޝަލް ބީޗުގައި ރޭ ބޭއްވި ޕީއެންސީގެ "ދަ ގްރޭޓާ އައްޑޫ" ކެމްޕެއިން ޖަލްސާގައި ވާހަކަދައްކަވަމުން، އިންތިހާބުގެ ކެމްޕެއިން މެނޭޖަރުކަންވެސް ކުރައްވާ ފަލާޙް ވިދާޅުވީ، ކައުންސިލްތަކަކީ މައި ސަރުކާރުން ހިންގާ ތަރައްޤީގެ މަޝްރޫޢުތަކަށް އެންމެ ބޮޑަށް އެހީތެރިވެދޭ ފަރާތްތައް ކަމަށެވެ. އެހެންކަމުން ރައްޔިތުންނަށް ތެދުވެރިކަމާއެކު ޚިދުމަތްކުރަން ބޭނުންވާ ކޮންމެ ވެރިއަކަށްވެސް، ރާއްޖޭގައި ބޭއްވޭ އެންމެ ބޮޑު އިންތިހާބު ކަމަށްވާ ލޯކަލް ކައުންސިލް އިންތިހާބު ކާމިޔާބުކުރުން ނުހަނު ބޭނުންތެރިވާނެކަމަށް އޭނާ ފާހަގަކުރެއްވިއެވެ.
ފަލާޙް އިތުރަށް ވިދާޅުވީ، ރަށްރަށާއި ސިޓީތަކުގައި ތިއްބަވާ ކައުންސިލަރުންނާއި މޭޔަރުން އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަކީ ސަރުކާރުގެ ތަރައްޤީގެ ތަސައްވުރު ޙަޤީޤަތަކަށް ހެދުމުގެ މައިގަނޑު ހިއްސާދާރުން ކަމަށެވެ. އަދި ރައްޔިތުންނަށް ޚިދުމަތްކުރަން ބޭނުންނުވާ ވެރިއަކަށް މި އިންތިހާބު ކާމިޔާބުވިޔަސް ނުވިޔަސް ފަރުވާލެއް ނުހުންނާނެކަމަށްވެސް އޭނާ ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ފަސްޓް ލޭޑީ ސާޖިދާ މުޙައްމަދުގެ އިތުރުން ވަޒީރުންނާއި ޕީއެންސީގެ މަޖިލިސް މެންބަރުން ބައިވެރިވެވަޑައިގެންނެވި މި ޖަލްސާގައި، ސަރުކާރުގެ އަމާޒަކީ ރާއްޖޭގެ އެކި ކަންކޮޅުތަކުގައި ފަށާފައިވާ މަސައްކަތްތައް ހުއްޓުމެއްނެތި ކުރިއަށްގެންގޮސް ނިންމުންކަން ފަލާޙް ވަނީ ތަކުރާރުކުރައްވާފައެވެ.
ކޮމެންޓު ފޮނުވާ