މިހާތަނަށް ގުޅީފަޅުން ގޯތި ލިބުނު ފަރާތްތަކުގެ ތެރެއިން 2690 މީހަކަށް ގޯތި ދޫކޮށްފައިވާކަމަށް އިމާރާތްކުރުމާއި ގެދޮރުވެރިކަމާ ބިނާރާބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން ވަޒީރު ވިދާޅުވީ، ބާކީ ތިބި މީހުންނަށް ރަޖިސްޓްރީ ހަވާލުކުރުމުގެ މަސައްކަތް މިހާރުވެސް ކުރިއަށްދާކަމަށެވެ. މި މަސައްކަތް ކޮންމެވެސް ވަރަކަށް ލަސްވެފައިވަނީ ގުޅީފަޅަށް ދަތުރުކުރުމާއި އެތަނުގެ އެތެރޭގައި އުޅުމަށް ހުރި ދަތިތަކާ ގުޅިގެންނެވެ. އެހެންނަމަވެސް، ގުޅީފަޅަށް ނުގޮސް މާލެއިން ގޯއްޗާ ހަވާލުވެވޭނެ އިންތިޒާމު މިހާރު ހަމަޖައްސައި، އެކަން ގޯތި ލިބުނު ފަރާތްތަކަށް އަންގާފައިވާކަމަށް އެމަނިކުފާނު ވިދާޅުވިއެވެ.
މީގެ އިތުރުން މުއްޠަލިބު ވިދާޅުވީ، ހުޅުމާލެ ފޭސް 3 ހިއްކައި މިހާރު ނިމިފައިވާއިރު، އެތަނުން ގޯތި ލިބުނު މީހުންނަށް ރަޖިސްޓްރީ ހަދައިދިނުމުގެ މަސައްކަތްތައް ފެށިފައިވާކަމަށެވެ. އަދި ސަރވޭގެ ކަންކަން ނިމޭވަރަކުން އެތަނުގެ ގޯތިތައްވެސް ހަވާލުކުރަމުން ގެންދާނެކަމަށް ވިދާޅުވިއެވެ. ހަމައެއާއެކު، ގިރާވަރުފަޅު ހިއްކުމުގެ މަސައްކަތް ބާރު ދުވެލީގައި ކުރިއަށްދާކަން ފާހަގަކުރައްވައި، އެ މަސައްކަތް ނިމުމުން އައު ޕްލޭނާ އެއްގޮތަށް ގޯތި ހަވާލުކުރުމުގެ ކަންކަން ފެށިގެންދާނެކަމަށްވެސް ވަޒީރު ވިދާޅުވިއެވެ.
ގުޅީފަޅާއި ގިރާވަރުފަޅުން ގޯތި ދޫކޮށްފައިވަނީ ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ހިންގި "ބިންވެރިޔާ" މަޝްރޫޢުގެ ދަށުންނެވެ. މި ސަރުކާރުން ވަނީ ކުރިން ހަދާފައިވާ ލޭންޑް ޔޫސް ޕްލޭނަށް ބަދަލުގެނެސް، ގިރާވަރުފަޅުން ދޫކޮށްފައިވާ ބައެއް ގޯތިތައް ގުޅީފަޅަށް ބަދަލުކުރުމަށް ނިންމާފައެވެ. އަދި އެ ބަދަލުތަކާ ގުޅިގެން، ކުރިން ދޫކޮށްފައިވާ ބައެއް ރަޖިސްޓްރީތައް ވަނީ ބާޠިލުކޮށްފައެވެ.
ކޮމެންޓު ފޮނުވާ