އެމެރިކާއާއި ޔަހޫދީން ގުޅިގެން އީރާނުގެ އާންމު ރައްޔިތުންނަށް އަމާޒުކޮށް ދެމުންދާ ޙަމަލާތަކުގައި ޝަހީދުވި މީހުންގެ އަދަދު 1،332 އަށް އުފުލިއްޖެ ކަމަށް އީރާނުން އދ. އަށް ކަނޑައަޅާފައި ހުންނަވާ ސަފީރު އަމީރު ސަޢީދު އީރުވާނީ ވިދާޅުވެއްޖެއެވެ.
ފެބުރުވަރީ 28 ވަނަ ދުވަހު އެމެރިކާގެ ރައީސް ޑޮނަލްޑް ޓްރަމްޕާއި ޔަހޫދީ ބޮޑުވަޒީރު ބެންޔަމިން ނަތަންޔާހޫގެ އަމުރަށް ފެށި މި ހަނގުރާމައިގައި އެތައް ހާސް ބަޔަކު ވަނީ ޒަޚަމުވެފައެވެ. ނިއުޔޯކްގައި ހުންނަ އދ. ގެ މައި މަރުކަޒުގައި ނޫސްވެރިންނާ ވާހަކަފުޅު ދައްކަވަމުން އީރުވާނީ ފާހަގަކުރެއްވި ގޮތުގައި، މި ފަރާތްތަކުން ޙަމަލާތައް އަމާޒުކުރަމުންދަނީ އާންމުން ދިރިއުޅޭ ރަށްތަކަށެވެ. އަދި މިކަމުގައި ބޭނުންކުރަމުންދަނީ ނުރައްކާތެރި އަދި ފަނާކުރަނިވި ހަތިޔާރުތަކެވެ.
އީރާނުން ރައްދުގައި ދޭ ޙަމަލާތައް އަމާޒުކުރަނީ ޔަހޫދީ ދައުލަތާއި އެހެނިހެން ޤައުމުތަކުގައި ޤާއިމުކޮށްފައިވާ އެމެރިކާގެ އަސްކަރީ މަރުކަޒުތަކަށް ކަމަށާއި، އާންމުންނަށް އަމާޒުކޮށް ޙަމަލާ ނުދޭކަމަށް ސަފީރު ވިދާޅުވިއެވެ. އަދި މަދަނީ ބިނާރުތަކަށް ގެއްލުންވެފައިވަނީ އެމެރިކާގެ ދިފާޢީ ނިޒާމުތަކުން ޙަމަލާތައް ހުއްޓުވަން އުޅުމުގެ ތެރޭގައި އަމާޒު ބަދަލުވުމުން ކަމަށް ބެލެވޭކަމަށްވެސް އޭނާ ވިދާޅުވިއެވެ.
މާރިޗު 6 ވަނަ ދުވަހު ޓްރަމްޕް ވަނީ އީރާނުން އެއްވެސް ޝަރުޠަކާ ނުލައި އަމާންދިނުމަށް ގޮވާލައްވައިފައެވެ. އަދި އީރާނުގެ އައު ރޫހީ ވެރިޔާ އަކީ އެމެރިކާ ޤަބޫލުކުރާ މީހަކަށް ވާންޖެހޭނެކަމަށް ވިދާޅުވެ، އެކަމުގައި އެމެރިކާގެ ބައިވެރިވުން އޮންނަންޖެހޭނެކަމަށް ވަނީ ދަޢުވާކުރައްވާފައެވެ. މިއީ އދ. ގެ ޗާޓަރާ ކަނޑައެޅިގެން ޚިލާފަށް، ބޭރު ޤައުމެއްގެ ދާޚިލީ ކަންކަމަށް ނުފޫޒު ފޯރުވުން ކަމަށް އީރުވާނީ ވަނީ ރައްދު ދެއްވާފައެވެ. އޭނާ ވިދާޅުވީ އީރާނުގެ އިސްވާރުން ޢައްޔަންކުރާނީ އެ ޤައުމުގެ ޤާނޫނުއަސާސީއާ އެއްގޮތަށް، ހަމައެކަނި ރައްޔިތުންގެ އިޚްތިޔާރުން ކަމަށެވެ.
މި ހަނގުރާމައިގެ ފުރަތަމަ ދުވަހު އީރާނުގެ އަންހެން ކުދިންގެ މަދަރުސާއަކަށް ބޮންއަޅައި 180 ވަރަކަށް ދަރިވަރުން ވަނީ ޝަހީދުކޮށްލާފައެވެ. މީގެ ފަހަތުގައިވަނީ އެމެރިކާގެ އަސްކަރިއްޔާކަމަށް އެ ޤައުމުގެ ތަޙުޤީޤީ އިދާރާތަކުން ދާދިފަހުން ހާމަކޮށްފައިވާއިރު، މިކަން އިތުރަށް ކަށަވަރުކުރުމުގެ މަސައްކަތް ދަނީ ކުރަމުންނެވެ. މި ހަމަނުޖެހުންތަކާ ގުޅިގެން، ބައެއް ޤައުމުތައް މެދުވެރިވެގެން ހަނގުރާމަ ހުއްޓުވުމުގެ މަޝްވަރާތައް އެމެރިކާއާއި އީރާނާ ދެމެދު މިހާރު ފަށާފައިވާ ކަމަށް ރިޕޯޓުތައް ބުނެއެވެ.
ކޮމެންޓު ފޮނުވާ