ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަރައްޤީގެ ތަޞައްވުރު ރައްޔިތުންނަށް ގެނެސްދިނުމަށްޓަކައި، ކުރިއަށް އޮތް ލޯކަލް ކައުންސިލް އިންތިޚާބުގައި ޕީއެންސީގެ ކެންޑިޑޭޓުން ހޮވުން މުހިންމުކަމަށް ނައިބު ރައީސް ޙުސައިން މުޙައްމަދު ލަޠީފް ވިދާޅުވެއްޖެއެވެ.
ޕީއެންސީގެ ފަރާތުން ހދ. އަތޮޅަށް ޚާއްޞަކޮށްގެން މާލޭގައި ހުޅުވި ޖަގަހަ އިފްތިތާޙުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވިދާޅުވީ، ކައުންސިލްތަކަކީ ސަރުކާރަށް ފުރިހަމައަށް އެއްބާރުލުންދޭ ބަޔަކަށް ކޮންމެހެންވެސް ވާންޖެހޭނެ ކަމަށެވެ.
އިދިކޮޅު ފަރާތްތަކަށް ފާޑުވިދާޅުވަމުން އެމަނިކުފާނު ފާހަގަކުރެއްވީ، އިދިކޮޅު ކެންޑިޑޭޓުން އިންތިޚާބުވެއްޖެނަމަ ސަރުކާރާ ދެކޮޅަށް މަސައްކަތްކުރާނެކަން އެ ފަރާތްތަކުގެ ވާހަކަތަކުން ދޭހަވާކަމަށެވެ. އަދި މާޒީގައިވެސް އެފަރާތްތަކުން ޢަމަލުކޮށްފައިވަނީ ސަރުކާރަށް އުނދަގޫވާ ގޮތަށްކަން އެމަނިކުފާނު ފާހަގަކުރެއްވިއެވެ.
މީގެ އިތުރުން ނައިބު ރައީސް ވިދާޅުވީ، ޕީއެންސީގެ ކެންޑިޑޭޓުން މަސައްކަތްކުރާނީ ރައީސުލްޖުމްހޫރިއްޔާއަށް އިޖާބަދީ، ސަރުކާރުގެ ސިޔާސަތުތަކާ އެއްގޮތަށްކަމަށެވެ. އަދި ޤައުމަށް ތަރައްޤީ ގެނެވޭނީ ތަރައްޤީގެ ފިކުރަށް ތާއީދުކުރާ ބަޔަކާއެކުކަމަށް ވިދާޅުވެ، ސަރުކާރުގެ ވިސްނުންތައް ރައްޔިތުންނާ ހަމައަށް ފޯރުކޮށްދިނުމަށްޓަކައި ސަރުކާރަށް ނިސްބަތްވާ ކެންޑިޑޭޓުން އިންތިޚާބުކުރުމުގެ މުހިންމުކަން އެމަނިކުފާނު ވަނީ ތަކުރާރުކުރައްވާފައެވެ.
ކޮމެންޓު ފޮނުވާ