އެމެރިކާއިން އީރާނާ ދެކޮޅަށް ހިންގަމުންދާ ވަރުގަދަ ޢުދުވާންތަކުގެ ތެރެއިން، ސްރީ ލަންކާގެ ކަނޑުގެ ސަރަޙައްދު ކައިރިން ދަތުރުކުރި އީރާނުގެ އަސްކަރީ މަނަވަރަކަށް ޙަމަލާއެއް އަމާޒުވެދާނެކަމުގެ ބިރަށް، އެ އުޅަނދުގެ 208 ފަޅުވެރިން ލަންކާއިން ސަލާމަތްކޮށްފިއެވެ.
މިދިޔަ މާރިޗު މަހުގެ 4 ވަނަ ދުވަހު އެމެރިކާގެ ކަނޑުގެ ސިފައިން ވަނީ ލަންކާ ސަރަޙައްދުން ދަތުރުކުރި އީރާނުގެ "އައިރިސް ޑެނާ" މަނަވަރަށް ޓޯޕީޑޯ ޙަމަލާއެއްދީ ފައްތާލާފައެވެ. މި ޙަމަލާގައި 87 މީހުން ޝަހީދުވިއިރު، އޭގެ ދެ ދުވަސް ފަހުން އިންޖީނުގެ މައްސަލަތަކަކާއެކު ހަމަ އެ ސަރަޙައްދުން ދަތުރުކުރި އީރާނުގެ ދެވަނަ މަނަވަރު ކަމަށްވާ "އައިރިސް ބޫޝެހްރު" އަށް އެހީތެރިވުމަށް ލަންކާއިން ނިންމީ އިންސާނީ ޒިންމާއެއްގެ ގޮތުން ކަމަށް އެ ޤައުމުގެ ރައީސް އަނޫރާ ކުމާރާ ދިސަނަޔަކެ ވަނީ ވިދާޅުވެފައެވެ.
ލަންކާއިން ސަލާމަތްކުރި ގިނަ ފަޅުވެރިން ކޮލޮމްބޯއަށް ގެންގޮސް ޞިއްޙީ ފަރުވާ ދިނުމަށްފަހު މިހާރު ބައިތިއްބާފައި ތިބީ ވެލިސަރާ ކަނޑުމަތީ ސިފައިންގެ ކޭމްޕުގައެވެ. ނަމަވެސް އުޅަނދު ބެލެހެއްޓުމަށް 15 ފަޅުވެރިއަކު އަދިވެސް މަނަވަރުގައި ތިބިއިރު، އެ މަނަވަރު މިހާރު އޮތީ ޓްރިންކޮމަލީ ހާބަރަށް ގެންގޮސްފައެވެ.
އެމެރިކާއާއި އީރާނަކީ ވެސް ލަންކާގެ ވިޔަފާރީގެ މުހިންމު ދެ ބައިވެރިންނެވެ. އެގޮތުން ލަންކާގެ އަންނައުނުގެ ބޮޑު ބައެއް އެމެރިކާއަށް އެކްސްޕޯޓުކުރާއިރު، ސައިފަތް އެންމެ ގިނައިން ގަންނަ އެއް ޤައުމަކީ އީރާނެވެ.
ފެބްރުއަރީ 28 އިން ފެށިގެން އެމެރިކާއާއި ޔަހޫދީން ގުޅިގެން އީރާނަށް ދެމުންދާ ޙަމަލާތަކުގައި އީރާނުގެ ރޫޙީ ވެރިޔާ އާޔަތުﷲ ޢަލީ ޚާމަނާއީއާއި އެމަނިކުފާނުގެ ޢާއިލާގެ ބައެއް މެންބަރުން ހިމެނޭހެން ހާހަކަށްވުރެ ގިނަ މީހުން ވަނީ ޝަހީދުކޮށްލާފައެވެ. މީގެ ރައްދުގައި އީރާނުން ވެސް އަންނަނީ މެދުއިރުމަތީގައިވާ އެމެރިކާގެ މަރުކަޒުތަކަށާއި ޔަހޫދީ ދަޢުލަތަށް އަމާޒުކޮށް ވަރުގަދަ ޙަމަލާތަކެއް ދެމުންނެވެ.
ކޮމެންޓު ފޮނުވާ