ދުނިޔޭގެ ފަތުރުވެރިކަމުގެ ދާއިރާގެ އެންމެ ބޮޑު މައުރަޒު ކަމަށްވާ "އައިޓީބީ ބާލިން" ގެ އަންނަ އަހަރުގެ ފެއާ ހޯސްޓްކުރާ ގައުމަކަށް ދިވެހިރާއްޖެ ހަމަޖައްސައި، އެކަމުގެ ރަސްމީ އެއްބަސްވުމުގައި ސޮއިކޮށްފިއެވެ.
ޖަރުމަނުވިލާތުގައި މިހާރު ކުރިއަށްދާ އައިޓީބީ ބާލިން ފެއާގައި ހުންނަ ރާއްޖޭގެ ސްޓޭންޑުގައި ބޭއްވި ހާއްސަ ރަސްމިއްޔާތެއްގައި، މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ވިޒިޓް މޯލްޑިވްސް ނުވަތަ އެމްއެމްޕީއާރުސީގެ މެނޭޖިން ޑިރެކްޓަރު އިބްރާހީމް ޝިއުރީއެވެ. އަދި ފެއާ އިންތިޒާމުކުރާ މެސޭ ބާލިންގެ ފަރާތުން ސޮއިކުރެއްވީ އެ ކުންފުނީގެ ސީއީއޯ މާރިއޯ ޓާބިއަސްއެވެ.
މި އެއްބަސްވުމާ ގުޅޭގޮތުން ވާހަކަދައްކަވަމުން ޝިއުރީ ވިދާޅުވީ، ދުނިޔޭގެ ފެންވަރުގައި ބާއްވާ އެންމެ ބޮޑު އެއް ފެއާ ހޯސްޓްކުރުމުގެ ފުރުސަތު ރާއްޖެއަށް ލިބުނީ އެހެން ގައުމުތަކާ ވާދަަކޮށްގެން ކަމަށާއި، މިއީ ރާއްޖެއަށް ލިބުނު ވަރަށް ބޮޑު ފަހުރެއް ކަމަށެވެ. އަދި ހޯސްޓް ކަންޓްރީގެ ގޮތުގައި ރާއްޖެ ހަމަޖެހިގެން ދިއުމަކީ މި މައުރަޒަށް ޒިޔާރަތްކުރާ އެތައް ހާސް ބައެއްގެ ސަމާލުކަން ރާއްޖެއަށް ހުއްޓި، ރާއްޖޭގެ ފަތުރުވެރިކަމުގެ ބްރޭންޑް އިތުރަށް ވަރުގަދަވެގެންދާނެ ކަމެއްކަން އޭނާ ފާހަގަކުރެއްވިއެވެ.
މީގެ އިތުރުން، މިއީ ދުނިޔޭގެ މަޤުބޫލު މަންޒިލެއްގެ ގޮތުގައި ރާއްޖެ ދެމިއޮތުމަށް އެޅިގެންދިޔަ މުހިންމު ފިޔަވަޅެއްކަމަށް ޝިއުރީ ވިދާޅުވިއެވެ. ރާއްޖެއިން ވަނީ މީގެ ކުރިން 2016 ވަނަ އަހަރުވެސް އައިޓީބީ ބާލިން ފެއާގެ ހޯސްޓް ކަންޓްރީގެ މަޤާމު އަދާކޮށްފައެވެ.
ކޮމެންޓު ފޮނުވާ