ހުޅުމާލޭގައި ފުޓްބޯޅަ ޓްރެއިނިން ފެސިލިޓީއެއް އެޅުމަށް އެފްއޭއެމަށް ދޫކުރި ބިމުގެ ބައެއް ކުއްޔަށް ދީގެން ލިބުނު 52 މިލިއަން ރުފިޔާގެ ތެރެއިން 29 މިލިއަނަށްވުރެ ގިނަ ރުފިޔާއަށް ވީނުވީއެއް ނޭނގި ގެއްލިފައިވާކަން އެކަމާ ގުޅޭގޮތުން ހެދި ހާއްސަ އޮޑިޓަކުން ހާމަވެއްޖެ އެވެ.
ސަރުކާރުން އެޗްޑީސީ މެދުވެރިކޮށް އެފްއޭއެމަށް 2021 ވަނަ އަހަރު ދޫކުރި މި ބިމުގެ 12 ބްލޮކެއް ކޮމާޝަލް ބޭނުންތަކަށް ވަނީ ކުއްޔަށް ދޫކޮށްފަ އެވެ. މި މުއާމަލާތްތަކާ ގުޅޭ އޮޑިޓް ރިޕޯޓުގައިވާ ގޮތުން 2025 ގެ ނިޔަލަށް އެތަންތަނުން ކުލީގެ ގޮތުގައި 56 މިލިއަން ރުފިޔާ ލިބެންޖެހޭއިރު، ފާއިތުވި ހަތަރު އަހަރު ތެރޭގައި 52 މިލިއަން ރުފިޔާ ލިބިފައިވާކަން ރެކޯޑުތަކުން ދައްކަ އެވެ. ނަމަވެސް އޭގެ ތެރެއިން އެފްއޭއެމްގެ އެއްވެސް ކަމަކަށް ބޭނުން ނުކުރެވި، 29.6 މިލިއަން ރުފިޔާ ގެއްލިފައިވާ ކަމަށް އޮޑިޓުގައި ވަނީ ފާހަގަކޮށްފަ އެވެ.
މި ފައިސާ ގެއްލިފައިވާ ގޮތްތަކުގެ ތަފްސީލަށް ބަލާއިރު، އެންމެ ބޮޑު އަދަދެއް ހިމެނެނީ އެފްއޭއެމްގެ އިސްވެރިން ނަގުދު ފައިސާ އާއި ޗެކުގެ ގޮތުގައި ނަގާފައިވާ ފައިސާ އެވެ. އެގޮތުން ބިމުގެ ސްލޮޓްތަކާއި އިމާރާތުގެ ފްލޯތައް ކުއްޔަށް ނެގި ފަރާތްތަކުން ދެއްކި 14.10 މިލިއަން ރުފިޔާ އެ އިދާރާގެ އިސްވެރިން ބަލައިގަނެފައިވާކަން ލިޔެކިޔުންތަކުން އެނގެން އެބަހުއްޓެވެ. އޭގެ ތެރެއިން 9.9 މިލިއަން ރުފިޔާ ފައިނޭންސް ޑިރެކްޓަރު ބަލައިގަތްއިރު، 3 މިލިއަން ރުފިޔާ އެފްއޭއެމްގެ ރައީސް އަދި 1.2 މިލިއަން ރުފިޔާ ސެކްރެޓަރީ ޖެނެރަލް ބަލައިގެންފައިވާ ކަމަށް ރިޕޯޓުގައިވެ އެވެ.
މީގެ އިތުރުން، އެފްއޭއެމްގެ ބޭންކް އެކައުންޓްތަކަށް ކުލީގެ ގޮތުގައި ޖަމާވި ފައިސާގެ ތެރެއިން 14.07 މިލިއަން ރުފިޔާ އަމިއްލަ ކުންފުނިތަކަށާއި ފަރުދުންގެ އެކައުންޓްތަކަށް ފޮނުވާފައިވާކަން ވެސް ވަނީ ފަޅާއަރާފަ އެވެ. އޭގެ ތެރެއިން 8.9 މިލިއަން ރުފިޔާ ޖަމާކޮށްފައިވަނީ ބޭރު ފައިސާ ގަނެ ވިއްކާ ކުންފުންޏެއް ކަމަށްވާ "އެމްއެސް ފައިނޭންސް" އަށެވެ. އެފްއޭއެމަކީ ޑޮލަރުން އާމްދަނީ ލިބޭ ތަނަކަށްވާއިރު، އެއްވެސް ހިދުމަތެއް ހޯދުމަކާ ނުލައި އެހާ ގިނަ ފައިސާ އެ ކުންފުންޏަށް ފޮނުވާފައިވަނީ ނާޖާއިޒު މަންފާއެއް ހޯދުމަށް ކަމަށް ބެލެވޭ ކަމަށް އޮޑިޓްގައި ބުނެފައިވެ އެވެ.
އަމިއްލަ ފަރާތްތަކަށް ފޮނުވި ފައިސާގެ ބާކީ 5 މިލިއަން ރުފިޔާ ޖަމާކޮށްފައިވަނީ ފައިނޭންސް ޑިރެކްޓަރާއި އަމިއްލަ ފަސް ފަރުދަކަށާއި ފަސް ކުންފުންޏަކަށެވެ. ނަމަވެސް މިއީ ކޮން ބޭނުމެއްގައި ދޫކުރި ފައިސާއެއްކަން އެނގޭނެ ލިޔެކިޔުމެއް ނެތެވެ. ހަމައެއާއެކު، 2022 އަދި 2023 ވަނަ އަހަރު އެކި ފަހަރުމަތިން ނަގުދު ފައިސާގެ ގޮތުގައި ނަގާފައިވާ 1.4 މިލިއަން ރުފިޔާ ހަރަދުކުރި ގޮތުގެ އެއްވެސް ރެކޯޑެއް ވެސް ފެންނަން ނެތް ކަމަށް އޮޑިޓް ރިޕޯޓުގައި ވަނީ ހާމަކޮށްފަ އެވެ.
ކޮމެންޓު ފޮނުވާ