މެދުއިރުމަތީގެ ސަރަހައްދީ މަސްރަހު ނުތަނަވަސްވެފައިވާތީ، ދުނިޔޭގެ އެންމެ ބޮޑު އެއް ޝިޕިންގ ކުންފުނި ކަމަށްވާ މާސްކް އިން ގަލްފުގެ ގިނަ ގައުމުތަކަކަށް މުދާ އުފުލުމަށް ހަދާ ބުކިންތައް ނެގުން ވަގުތީގޮތުން ހުއްޓާލައިފިއެވެ.
މިކަމާ ގުޅިގެން އެ ކުންފުނިން ހިއްސާކޮށްފައިވާ މައުލޫމާތުތަކަށް ބަލާއިރު، ޔުނައިޓެޑް އެރަބް އެމިރޭޓްސް (ޔޫއޭއީ)، އިރާގު، ކުވެއިތު، ގަތަރު އަދި ބަހްރައިންގެ އިތުރުން ސައުދީ އަރަބިއްޔާގެ ދައްމާމް އާއި ޖުބައިލް ހިމެނޭހެން އެ ގައުމުތަކަށް މުދާ އެތެެރެކުރުމާއި ބޭރުކުރުމަށް ބުކިންގ ހެދުން ވަނީ މެދުކަނޑާލާފައެވެ. މީގެ އިތުރުން އޮމާންގެ ސަލާލާ ބަނދަރު ފިޔަވައި އެހެން ސަރަހައްދުތަކަށް ވެސް މި ވަގުތު މުދާ އުފުލުން ވަނީ ހުއްޓާލާފައެވެ. މާސްކް އިން ބުނެފައިވަނީ މިއީ ވަކި ގޮތެއް އަންގަންދެން އަޅާފައިވާ ފިޔަވަޅެއް ކަމަށެވެ.
މި ނިންމުން ނިންމާފައިވަނީ ސަރަހައްދުގެ ހާލަތު ދެނެގަތުމަށް ހެދި ޚާއްސަ ރިސްކް އެސެސްމަންޓްތަކަށް ރިއާޔަތްކުރުމަށް ފަހުގައެވެ. އެ ކުންފުނިން ހާމަކުރި ގޮތުގައި މިފަދަ ފިޔަވަޅެއް އެޅުމުގެ މައިގަނޑު ބޭނުމަކީ ކުންފުނީގެ މުވައްޒަފުންގެ ސަލާމަތާއި ރައްކާތެރިކަން ކަށަވަރުކުރުމާއި، ކަސްޓަމަރުންގެ މުދާ ހިމާޔަތްކުރުމުގެ އިތުރުން މުޅި ޝިޕިންގ ނެޓްވޯކްގެ އޮޕަރޭޝަންތައް ހުއްޓުމަކަށް ނައިސް ކުރިއަށް ގެންދިއުމެވެ.
ކޮމެންޓު ފޮނުވާ