ދައުލަތުގެ ހަރަދުތައް ހަމަޖެއްސުމަށް ބޭނުންވާ ފައިސާ ހޯދުމުގެ ގޮތުން، ފިނޭންސް މިނިސްޓްރީން ޖުމްލަ 3.4 ބިލިއަން ރުފިޔާގެ ޓްރެޝަރީ ބިލް (ޓީ-ބިލް) ވިއްކަން އަނެއްކާވެސް ހުޅުވާލައިފިއެވެ.
މިއީ ހިނގަމުންމިދާ އަހަރުގެ ތެރޭގައި ސަރުކާރުން ޓީ-ބިލް ވިއްކަން އިއުލާނުކުރި ފަސްވަނަ ފަހަރެވެ. މިފަހަރު ވިއްކަން ހުޅުވާލި ޓީ-ބިލްތަކުގެ ތެރޭގައި ހަތަރު މުއްދަތަކަށް ބަހާލައިގެން ވިއްކާ ބިލްތައް ހިމެނެއެވެ. އޭގެ ތެރޭގައި ހިމެނޭ އެންމެ ބޮޑު އަދަދަކީ އަންނަ އަހަރުގެ ފެބްރުއަރީ މަހުގެ 22 ވަނަ ދުވަހުގެ ނިޔަލަށް އަނބުރާ ދައްކާ ގޮތަށް ވިއްކާ 1.6 ބިލިއަން ރުފިޔާގެ ޓީ-ބިލެކެވެ. މީގެ އިތުރުން އަންނަ އެޕްރީލް ހަ ވަނަ ދުވަހަށް މުއްދަތު ހަމަވާ 1.1 ބިލިއަން ރުފިޔާގެ ޓީ-ބިލަކާއި، ޖޫން 15 އަށް ދައްކަންޖެހޭ 418 މިލިއަން ރުފިޔާގެ ބިލެއްގެ އިތުރުން، ސެޕްޓެމްބަރު 7 ވަނަ ދުވަހަށް މުއްދަތު ހަމަވާ 182 މިލިއަން ރުފިޔާގެ ޓީ-ބިލެއް ވެސް މީގެ ތެރޭގައި ހިމެނެއެވެ.
މިފަހަރު ވިއްކަން ނެރުނު ޓީ-ބިލްތަކުގެ އިންޓްރެސްޓް ރޭޓް އުޅެނީ 3.50 އިންސައްތަ އާއި 4.60 އިންސައްތައާ ދެމެދުގެ މިންވަރެއްގައެވެ. އާންމު ގޮތެއްގައި ސަރުކާރުން ވިއްކާ މިފަދަ ސެކިއުރިޓީޒް ގަންނަނީ ޕެންޝަން ފަންޑާއި، ބޭންކުތަކާއި ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ ބައެއް ވިޔަފާރިތަކުންނެވެ.
ޓީ-ބިލަކީ ސަރުކާރުގެ ސެކިއުރިޓީޒްގެ ތެރޭގައި ހިމެނޭ ކުރު މުއްދަތުގެ މާލީ އިންސްޓްރޫމެންޓެކެވެ. ރާއްޖޭގައި ޓީ-ބިލް ވިއްކަނީ ޑިސްކައުންޓް އަގެއްގައި ދޫކޮށް، އޭގެ މުއްދަތު ހަމަވުމުން މޫނުމަތީ އަގު (ފޭސް ވެލިއު) އަދާކުރާ ގޮތަށެވެ.
ކޮމެންޓު ފޮނުވާ