މި އަހަރުގެ މިހާތަނަށް ދައުލަތަށް ލިބުނު އާމްދަނީ އިތުރުވެ، ހަރަދުތައް ކުޑަކުރެވުމާ ގުޅިގެން ދައުލަތުގެ ބަޖެޓް ސާޕްލަސް 1.8 ބިލިއަން ރުފިޔާއަށް އަރައިފިއެވެ.
ފިނޭންސް މިނިސްޓްރީން އާންމުކޮށްފައިވާ ވީކްލީ ފިޒްކަލް ޑިވެލޮޕްމަންޓް ރިޕޯޓުން ދައްކާ ގޮތުގައި، ފެބްރުއަރީ މަހުގެ 26 ވަނަ ދުވަހުގެ ނިޔަލަށް ދައުލަތުން ވަނީ ޖުމްލަ 6.9 ބިލިއަން ރުފިޔާ ހޭދަކޮށްފައެވެ. މިއީ ލޯނު ދެއްކުމަށް ހޭދަކުރި ފައިސާއާއި، ރިކަރަންޓް އަދި ކެޕިޓަލް ހަރަދުގެ އިތުރުން އިންވެސްޓްމަންޓްތައް ހިމެނޭހެން ކޮށްފައިވާ ހޭދަތަކެކެވެ. މިދިޔަ އަހަރުގެ މި މުއްދަތުގައި ދައުލަތުގެ ހަރަދު ހުރީ 8.6 ބިލިއަން ރުފިޔާގައެވެ. އެހެންކަމުން މިއީ މިދިޔަ އަހަރާ އަޅާބަލާއިރު ދަށް އަދަދެކެވެ.
ހަރަދުތަކުގެ ތަފްސީލަށް ބަލާއިރު، ދައުލަތް ހިންގުމުގެ ހަރަދު ނުވަތަ ރިކަރަންޓް ހަރަދުގެ ގޮތުގައި މި މުއްދަތުގައި 5.4 ބިލިއަން ރުފިޔާ ހޭދަވިއިރު، ތަރައްގީގެ މަޝްރޫއުތަކާއި އެނޫންވެސް ކަންކަމަށް ހިނގާ ކެޕިޓަލް ހަރަދުގެ ގޮތުގައި ހޭދަކޮށްފައިވަނީ 434 މިލިއަން ރުފިޔާއެވެ.
ހަރަދުތައް ކުޑަވުމުގެ އިތުރުން ދައުލަތަށް ލިބުނު އާމްދަނީ ވަނީ މިދިޔަ އަހަރާ އަޅާބަލާއިރު ފާހަގަކޮށްލެވޭ މިންވަރަކަށް އިތުރުވެފައެވެ. އެގޮތުން މިދިޔަ އަހަރުގެ ފެބްރުއަރީ މަހުގެ ނިޔަލަށް 6 ބިލިއަން ރުފިޔާ ލިބުނު ނަމަވެސް، މި އަހަރުގެ މިހާތަނަށް އާމްދަނީގެ ގޮތުގައި 7.7 ބިލިއަން ރުފިޔާ ވަނީ ލިބިފައެވެ.
މި ތަފާސްހިސާބުތަކަށް ބަލާއިރު، ދައުލަތުގެ މާލީ ހާލަތު ދައްކުވައިދޭ ބަޖެޓްގެ ޕްރައިމަރީ ބެލެންސް ހުރީ 2.2 ބިލިއަން ރުފިޔާގެ ސާޕްލަސްއެއްގައެވެ. އަދި އޯވަރޯލް ބެލެންސް ހުރީ 1.8 ބިލިއަން ރުފިޔާގެ ސާޕްލަސްއެއްގައެވެ. މިދިޔަ އަހަރުގެ މި މުއްދަތުގައި ޕްރައިމަރީ ސާޕްލަސް ހުރީ އެއް ބިލިއަން ރުފިޔާގައެވެ.
ކޮމެންޓު ފޮނުވާ