ބ. ފުޅަދޫގެ އާންމު ސަރަހައްދުތަކުގައި ފަތުރުވެރިން ނިވާކަން ކުޑަ ހެދުން އަޅައިގެން އުޅޭ މައްސަލަ ހައްލުކުރުމުގެ ގޮތުން، އުސޫލާ ޚިލާފުވާ ފަތުރުވެރިން ޒިންމާވާ ގެސްޓްހައުސްތައް ޖޫރިމަނާކުރުމަށް އެރަށު ކައުންސިލުން ނިންމައިފިއެވެ.
މި ފިޔަވަޅު އަޅަން ނިންމީ ރަށުގެ އާންމު ތަންތަނުގައި މުޖުތަމައުގެ މިންގަނޑުތަކާ ހިލާފަށް ފަތުރުވެރިން ހެދުން އަޅައިގެން އުޅޭކަމުގެ ޝަކުވާ ރައްޔިތުންގެ ފަރާތުން ކައުންސިލަށް ތަކުރާރުކޮށް ލިބެމުންދާތީއެވެ. މިކަމާ ގުޅިގެން ކައުންސިލްގެ ރަސްމީ ޖަލްސާއެއްގައި މަޝްވަރާކުރުމަށްފަހު ވަނީ ހަރުކަށި ފިޔަވަޅުތަކެއް އަޅަން ކަނޑައަޅާފައެވެ.
ކައުންސިލުން ނެރުނު އިއުލާނުގައި ބަޔާންކޮށްފައިވާ ގޮތުގައި، ކުރިއަށް އޮތް ތަނުގައި އާންމު މިންގަނޑުން ބޭރުން ފަތުރުވެރިއަކު ހެދުން އަޅައިގެން އުޅޭކަން ފާހަގަކުރެވިއްޖެ ނަމަ، އެ ފަތުރުވެރިޔަކު ނިސްބަތްވާ ގެސްޓްހައުސްއެއް ބަލައި، އެ ތަނެއް 750 ރުފިޔާ އިން ޖޫރިމަނާ ކުރެވޭނެއެވެ.
މި އުސޫލަށް އަމަލުކުރުމަށް އަންގައި، ދިވެހި ބަހުންނާއި އިނގިރޭސި ބަހުން ވެސް ކައުންސިލުން މިހާރު ވަނީ އިއުލާނު ނެރެފައެވެ. މިއީ ރަށުގެ އިޖުތިމާއީ ފޭރާން ހިިފެހެއްޓުމަށާއި ރައްޔިތުންގެ ކަންބޮޑުވުންތަކަށް ހައްލު ހޯދައިދިނުމުގެ ގޮތުން އެޅި ފިޔަވަޅެއް ކަމަށް ކައުންސިލުން މައުލޫމާތު ދެއެވެ.
ކޮމެންޓު ފޮނުވާ