މެދުއިރުމަތީގައި މިހާރު ހިނގަމުންދާ ހަނގުރާމައިގެ ސަަބަބުން ދުނިޔޭގެ ބާޒާރުގައި ތެލުގެ އަގަށް ބޮޑެތި ބަދަލުތަކެއް އަންނަމުން ދިޔަ ނަމަވެސް، ރާއްޖެއަށް ތެލުގެ ދަތިކަމެއް ކުރިމަތިނުވާނެ ކަމުގެ ޔަގީންކަން އިކޮނޮމިކް މިނިސްޓަރު މުހައްމަދު ސައީދު މިއަދު ދެއްވައިފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރު ފާހަގަކުރެއްވި ގޮތުގައި، ހަނގުރާމައިގެ ސަބަބުން ބައިނަލްއަގުވާމީ މާކެޓުގައި ތެލުގެ އަގު އިއްޔެ އެކަނިވެސް ވަނީ %25 އާއި %30 އާ ދެމެދުގެ މިންވަރަކަށް އުފުލިފައެވެ. މެދުއިރުމަތީގައި ހަމަނުޖެހުމެއް އުފެދިއްޖެ ނަމަ އޭގެ އަސަރު އެންމެ ފުރަތަމަ އަދި އެންމެ ބޮޑަށް ކުރަނީ ތެލުގެ އަގަށްކަން ފާހަގަކުރައްވައި، ސައީދު ވިދާޅުވީ ސަރުކާރުން ފިޔަވަޅުތައް އަޅަމުންދަނީ މި ހާލަތަށް ރިއާޔަތްކޮށްގެން ކަމަށެވެ. އެހެންކަމުން ތެލާއި އެލްޕީޖީ ލިބުމުގައި ދަތިކަމެއް ނެތް ކަމަށާއި، އިރާދަކުރެއްވިއްޔާ ރާއްޖެ ތެލަށް ނުޖެހޭނެކަމުގެ ޔަގީންކަން މިނިސްޓަރު ދެއްވިއެވެ.
ރާއްޖޭގެ އާބާދީއާއި، މަސައްކަތްކުރާ ފަރާތްތަކުގެ އިތުރުން ޒިޔާރަތްކުރާ ފަތުރުވެރިންގެ އަދަދު އިތުރުވަމުންދާތީ، އެ އެންމެންނަށް ބޭނުންވާ މިންވަރަށް ތެލާއި ކާބޯތަކެތި ރައްކާކުރެވޭނެ އިންތިޒާމުތައް ހަމަޖެއްސުމަށް ސަރުކާރުން އަންނަނީ މަސައްކަތް ކުރަމުންނެވެ. މިނިސްޓަރު ވިދާޅުވި ގޮތުގައި މުދާ ރައްކާކުރާ ކެޕޭސިޓީ އިތުރުކުރުމުގެ އިތުރުން، ރާއްޖެއަށް މުދާ ގެނައުމަށް އިތުރު ރޫޓުތައް ހޯދުމުގެ މަސައްކަތްވެސް ދަނީ ކުރެވެމުންނެވެ. މީގެ ބޭނުމަކީ ރައްޔިތުންގެ ފުޑް ސެކިއުރިޓީއާއި ލޮޖިސްޓިކްސް ދެމެހެއްޓެނިވި ގޮތެއްގައި ކަށަވަރުކުރުމެވެ.
މިކަމާ ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ވަނީ ވާހަކަފުޅު ދައްކަވާފައެވެ. އިއްޔެ ބޭއްވި ނޫސްވެރިންގެ ބައްދަލުވުމުގައި އެމަނިކުފާނު ވިދާޅުވެފައި ވަނީ ހާލަތު އެންމެ ގޯސްވެދާނެ ކަމަށް ބަލައި ތައްޔާރުވަމުން ދިޔަ ނަމަވެސް، ރާއްޖެއަށް ތެލާއި ކާބޯތަކެތި ނުލިބިދާނެ ކަމުގެ ބިރެއް ނެތް ކަމަށެވެ. އަދި އެ ހާލަތަށް ކަންތައްތައް ދާނެ ކަމަށް ޤަބޫލުފުޅު ނުކުރައްވާ ކަމަށް ވެސް ރައީސް ވަނީ ވިދާޅުވެފައެވެ.
ކޮމެންޓު ފޮނުވާ